ما بقاوش لاعبين الوداد الرياضي قادرين يهزو الراس قدام جماهير الفريق، وهذا الشي بسبب النتائج السلبية اللي كيحصدوها مؤخرا، وآخرها التعادل السلبي مع يوسفية برشيد متذيل ترتيب البطولة. وبعدما سالا ماتش الوداد الرياضي ويوسفية برشيد بنتيجة زيرو لزيرو فتيران برشيد، ناضت مجموعة من جمهور الوداد الغاضبة بسبب هاد النتيجة وبدات كتعاير فاللاعبين وكتسبهم لدرجة أن شي لاعبين بقاو گالسين فبلاصة الاحتياط حتى خرجو المشجعين احتراما لهم، حيث ما بقاش عندهم الوجه باش يشوفو فيهم. جماهير الوداد الرياضي اللي ديبلاصات لتيران برشيد، وقبل ما يبدا الماتش ضد يوسفية برشيد هزات ميساج قاصح وجهات للاعبين وقالت لهم بصريح العبارة: "التاريخ كيسجل أسماء الرجال ماشي لي لاعبين على قبل المال"، والمشجعين الوداديين شجعو الفريق حتى سالات المباراة، ولكن كاين اللي فيهم ما قدرش يتحمل وشن الغضب ديالو وعاير لاعبين الفريق. وبعدما سالا الماتش بين الوداد الرياضي ويوسفية برشيد، ودوشو اللاعبين وخرجو من الفيستيير، فحتى واحد فيهم ما بغى يعطي شي تصريح للصحافة، وكلهم كانت باينة عليهم مرارة التعادل السلبي وهذا الوضع الصعيب اللي كيعيشو الفريق اللي ديما كان متعود على التتويج بالألقاب ودابا صبح خارج بكري من سباق المنافسة على لقب البطولة الاحترافية.