الوداد رابحين برشيد فماتش حاضر فيه ايت منا.. واش باغي يشد رئاسة الواك بلاصة الناصيري

خرجو الوداد الرياضي رابحين الشوط الاول من الماتش ديالهم اللي بادي هاد العشية من اليوم السبت ضد يوسفية برشيد، ضمن الجولة 9 من البطولة الاحترافية لكرة القدم.
الماتش اللي بادي فتيران البشير فالمحمدية بين الوداد وبرشيد سالا الشوط الاول ديالو بنتيجة واحد لزيرو لمصلحة الفريق الآحمر، ماركاه يحيى عطية الله فالدقيقة 17، واللعب مفتوح بين الفريقين وممكن يكون اهداف فالشوط الثاني سوا بالنسبة للوداد اللي غيبغيو يضمنو الرباح او برشيد اللي باغيين يرجعو فالماتش.
المباراة بين الوداد وبرشيد هي اول ماتش بالنسبة للواك بعد قرار الاعتقال الاحتياطي لرئيس النادي سعيد الناصيري فحبس عكاشة فالتحقيقات فقضية "إسكوبار الصحراء"، وهذا الشي تفاعلت معه الجماهير الودادية بميساج رفعاتو قبل الماتش قالت فيه: "وما مجد الوداد إلا برجالها، لتظل شوكة لا تكسر في حلق اعدائها".
وبالنسبة للمسؤولين على الوداد الرياضي، فحاضر منهم فماتش برشيد كل من عبد المجيد البرناكي نائب الرئيس، ومحمد طلال عضو المكتب المديري للنادي، وهما اللي ساهرين على كل صغيرة وكبيرة كتخص الفريق دابا.
من جهة حضر هشام ايت منا الرئيس السابق لشباب المحمدية ورئيس مجلس مدينة المحمدية، للماتش بين الوداد الرياضي ويوسفية برشيد هنا فتيران البشير فالمحمدية ورحب بالمدرب فوزي البنزرتي والوداديين، وسط بزاف من علامات الاستفهام على سبب الحضور ديالو للماتش، خصوصا وان كاينة معلومات كتقول بللي باغي يشد رئاسة الواك خلفا لسعيد الناصيري.