عرفات "كود" من مصادر محلية أن مدير المدرسة ابتدائية فسيدي قاسم اللي اغتصب تلميذة فعمرها 8 سنين خرج نهار السبت، بعدما تنازلو الوالدين ديالها على الدعوى. وحسب المصادر، فمن الوارد جدا يكونو الوالدين ديال البنت خداو تعويض مادي باش يتنازلو، وهكذا باعو كرامة بنتهم بثمن رخيص، وخلاو الجاني يفلت من العقاب والمحاسبة، واخا معروف الأثر اللي كيخلي الاغتصاب والاعتداء الجنسي فنفسية أي بنت، خصوصا إلى كانت قاصر. وقاضي التحقيق فابتدائية القنيطرة قرر الإفراج على مدير المدرسة بعد التنازل، بينما كان تعتقل نهار الخميس 31 دجنبر اللي فات من طرف البوليس. وحسب تصريحات الأساتذة فالمدرسة نفسها، تبين أن الضحية كانت كتمشي بشكل مستمر لمكتب المدير من أجل نسخ الأوراق، وهذشي اللي نكرو المتهم، كيف نكر جميع التهم المنسوبة ليه. وكانت البنية علمات واليديها باعتداء المدير عليها جنسيا، الشيء اللي خلاهم يقدمو بيه شكاية، قبل ما يتنازلو ليه من بعد.