وشوفو مع من عايشين. من بعد إكرام.. عائلة تنازلات لأربعيني اغتصب بنيتة د9 سنين عام كامل غير حيت بكرتها مامقيوساش .. وخوها ل"كود": أنا ماراضيش على هذ التنازل.. والجاني كان كيديها لعندو للبيت ويتكرفص عليها.. وبغيت الجمعيات يوقفو مع هذ البنت

قلة الوعي والأمية اللي ضاربة أفراد كثار فمجتمعنا المغربي، والخوف من "الشوهة" و"العار" و"كلام الناس"، واختزال قيمة البنت ف"البكرة" فقط، كلها أمور كتخلي مجموعة من العائلات يطبعو مع الاغتصاب والبيدوفيليا، واخا تكون الضحية طفلة أو قاصر لا حول لها ولا قوة، وتكون تعرضات لعنف واعتداء جنسي خطير يقدر يخلف فنفسيتها جرح عمرو يبرى.
مريم (9 سنوات)، اللي كتنحد من دوار توريرت انتلاس، التابع لدائرة فم زكَيد بإقليم طاطا، هي وحدة من الضحايا الكثار اللي تغتصبات وتهدر حقها، بعدما كان ولد خالة مها كيغتصب فيها باستمرار لمدة عام كامل، وفرغ الكبت ديالو فيها بلا رقيب ولا حسيب، وواخا عائلتها فكرات تتابعو قضائيا، وحطات بيه شكاية ف28 ماي اللي فات، رجعات من بعد تنازلات عليها بعدما رغبهم ورغبوهم الجيران.
عزيز، الأخ ديال مريم معمرو كان راضي على هذ التنازل، وقال فتصريحو ل"كود" بللي الجاحة اللي خلات العائلة يتنازلو بدم بارد هي الشهادة الطبية اللي داروها للبنت، واللي ثبتات أن البكرة ديالها مامقيوساش، فاعتقادهم أنه "مادام ما دار ليها حتى شي حاجة إذن القضية ماتستحقش المتابعة".
وأكد أخ الضحية بللي الجاني، اللي عندو 47 عام، كان كيسيفط الناس للدار باش يقنعو الوالدة ديالو بالتنازل، وكيقولو ليها بللي الطلوع والهبوط للمحكمة فأكَادير مرهق وصعيب، فيحين الزوج ديالها مريض وعيان وخاص اللي يقابلو.
وكشف أخ مريم بللي عمرها ما قدرات تصارحهم بشي حاجة، لكنها حكات لصحبتها اللي بدورها حكات لمها وتعرفات القضية، من بعد كَلسات معاهم وحكات ليهم كيفاش كان الجاني كيدخلها للبيت ديالو ويتكرفص عليها، وشي مرات كان كيديها لشي جنان قريب للدار، فمكان مخبي، وبللي كانت آخر مرة اغتصبها فيها قبل رمضان.
وقال الأخ ديال الضحية أنه استطع يقنع الوالدة ديالو بضرورة متابعة الجاني من جديد، خصوصا وأن البنت تعقدات بزاف، وديما مصدومة وساهية وكتفكر، ومرة مرة كتشس بآلام فلتحت ديالها "تكلمت مع جمعيات محلية وبينو على استعدادهم باش يعاونونا، هذ الجمعيات أكدو لي بللي غيجيو عندنا حتى للدار والأم ديالي ماتحتاجش تتحرك من بلاصتها، وهذشي زاد شجعها باش تعاود تحط شكاية من جديد"، على حساب هضرتو.
وطلب الأخ ديال مريم، عن طريق "كود"، جمعيات حماية الطفولة باش توقف فجنبها، وتساعدها باش يتحاسب الجاني على هذشي اللي دار، كيف طلب الصحافة باش تهتم بقضية الأخت ديالو وتوصل معاناتها على اوسع نطاق.
وللإشارة، فقضية مريم تزامنات مع قضية إكرام اللي ثارت جدل كبير هذ الأيام، واللي تعرضات بدورها للاغتصاب فمنطقة فم الحصن بإقليم طاطا، من طرف شخص أربعيني، وكانت تنازلات عائلتها حتى هي على الشكاية اللي حطات ضد هذ الشخص، لكن سرعان ما تراجعات على هذ القرار، وهو دابا متابع فحالة اعتقال.