منين جاهم الوحي باش يخرجو مجموعات وعلاش ما هدروش فقضية مدير “دوزيم” وسعد لمجرد وكالفان وكون هدرو نحتارموهم اليوم. جمعيات: ندين ما تتعرض له المصرحات والمشتكيات في قضية بوعشرين

كلشي فقضية توفيق بوعشرين مدير نشر “اخبار اليوم” غريب مثير. كيخلي الواحد تالف. كاينين ضحايا اكيد. المصرحات والمشتكيات اول الضحايا اييه. غير فهاد القضية واللي تبعها بداو شي وحدين كيحركو كيعبئو. ما هامهم لا عدالة لا حقوق نساء لا قرينة البراءة.
دابا خرج واحد البيان وقعاتو الجمعيات الموقعة: فدرالية الرابطة الديمقراطية لحقوق المرأة وجسور ملتقى النساء المغربيات واتحاد العمل النسائي والجمعية المغربية لمناهضة العنف ضد النساء. قالو فيه
-ان من حق كل امرأة تتعرض ﻻعتداء جنسي وضغوط كيفما كان نوعها ان لا تصمت عما تتعرض له وان تتوجه للعدالة لطلب اﻻنتصاف والحماية
-ندين بشدة كل الحمﻻت الشرسة والسب والقدف الذي تتعرض له المشتكيات والمصرحات في هذه القضية والذي يمس بكرامتهن وخصوصياتهن
– نتشيت بالمبدأ المنصوص عليه في الفصل 23 من الدستور الذي ينص على قرينة البراءة والمحاكمة العادلة لكل اطراف القضية والحق في الامن و السلامة الجسدية
واش فهمتو شي حاجة؟ والو. كلشي فهاد القضية تعرض للمس بكرامته. علاش هاد الجمعيات ما حركوش شي قضية ضد تسريب المحاضر.
ثم هاد الجمعيات شكون هاد النبي اللي نزل عليهم الوحي وبداو كيخرجو غير بشوية. اللي متبع اش كيتكتب وشكون كيحركو ما كاين حتى حاجة بريئة. هاد الجمعيات ما عندهمش مصداقية حقاش نهار اتهمات صحافية سابقة مدير القناة الثانية بالاغتصاب ونهار اثير موضوع التحرش واعتداءات جنسية فدزويم. صحافيون سابقون وهاد الجمعيات عارفينها ماشي غير تحرشو. ثم فين كانو باش خرجو بنات كيقولو باللي تعرضو لاغتصاب من قبل سعد لمجرد ومشاو للبوليس يقدمو شكاية وسولوهم واش عزبات ولا اللا؟ فين كنتو نهار خرج العفو على مغتصب الاطفال دانيال كالفان.
شفتو ما عندكمش مصداقية وتزيدو تشوهو فريوسكم. كيزيد الشك فطبيعة هاد التضامن باش تشوف شكون كيحرك هاد التضامن كيخسر قضية كتهم مجتمع كولو. شكون غير شكون مع شكون وغاديين طرحو اكثر من سؤال والضحية الاولى فهاد الشي كولو هما الصحافيات فالمقام الاول