اوا هي اللي نعسات مراتو مع شي واحد غايولي يسميها "تحرش جنسي".. واحد ماعجبوش الحال علاش المدام ديالو كانت فعلاقة جنسية مع شخص اخر ناض دار حالة وراسل المدير ديالو وبغاه يتعاقب.. شي حد يفسر لهاد السيد الفرق بين التحرش الجنسي وعلاقة جنسية بين جوج راشدين

واحد السيد سميتو ه ا.ق. راسل پي-دي-جي بنك "BMCE"، باش يشكي ليه بواحد من المتعاونين ديالو. حتى لهنا ماكاين مشكل، من حق اي واحد يتشكا من سلوك غير قانوني وسط الخدمة.
المشكلة هي فاش كنقراو السبب اللي خلا هاد السيد يتشكا، كنتصدمو! قالك ، مدير كبير فبنك بنجلون استخدم السلطة ديالو وتحرش جنسيا بمراتو اللي خدامة حتى هي فنفس البلاصة.
واخا، تحرش بيها كيفاش؟ بسل عليها، قالها كلام ماباغاش تسمعو؟ قاسها وهي دفعاتو؟ لا. البنكي ومرات هاد السيد كانو كينعسو بجوج، بيناتهم علاقة جنسية، وماخلاو فين تلاقاو، اوطيلات فكازا ومراكش وغيرها...
السيد كيهضر على الشرف ديال مراتو وشرفو حتى هو وقال انهم تقاسو، وعائلتو تشتت لها الشمل وكيرجع الفوط لبنعبد الجليل. باشمن لوجيك؟ مانعرفت!
اول مشكل فهاد التفكير الخامج ديال هاد خينا، هو انه كيصيل شرفو بمراتو وافعالها! وثانيا كيعتابرها قاصر او انسانة غير قادرة تاخد قراراتها براسها، سواء كانت مزيانة او خايبة وكيعتابرها غير مسؤولة. وثالثا، كيوصف علاقة فيها جنس رضائي بين جوج ديال الناس راشدين بتحرش، واش ماقلبش فالديكسيونير على معنى التحرش الجنسي قبل مايدير هاد الضحك فراسو؟
هذا مشكل بين مرا وراجلها، كان خاص يلقاوليه حل بيناتهم، ولكن هو بغى يردو مشكل بنكة وجريمة وماعرفت شنو، وكيطلب من الرئيس يعاقب بنعبد الجليل ويمنعو من انه يعاود هادشي مع مرا اخرى...
دابا هاد هشام تقاس فالإيگو ديالو ومارضاش علاش مراتو خدات قرار وبغات تمشي مع راجل اخر، وبغى ينتاقم توساپلومون، ولكن ماحسبهاش مزيان وصدق غير مخربقها. حيت اي واحد عندو جوج گرام ديال اللوجيك، غايقرا المراسلة ديالو وغيفهم انه ماكاين لاتحرش لاتاوزة.. جوج ديال الناس دخلو فعلاقة جنسية باختيارهم، والمرا راجلها عاق وطلقو.. والحياة كتستمر...