مابغاوش يخليو المقعد خاوي.. وفد برلماني مغربي غايمشي للجزائر بطيارة فرنسية والجزائر بغات تستغل منظمة التعاون الاسلامي باش ضرب الرباط بسباب التطبيع

رسميا وافق البرلمان المغربي بغرفتيه، يشارك في الدورة ال17 لمجالس الدول الأعضاء في منظمة التعاون الإسلامي، لي غاتكون منظمة فالجزائر.
"كود" حصلت على وثيقة تؤكد بأن الوفد المغرب غايمشي فطيارة فرنسية وغايمشي لفرنسا عاد يتوجه نحو الجزائر.
رشيد الطالبي العلمي رئيس مجلس النواب توصل بدعوة للمشاركة، وبعدما الشتاور مع السلطات المعنية بكل ما هو دبلوماسي، وافق على قبول دعوة المشاركة فهاد التظاهرة اللي كتنظمها منظمة التعاون الاسلامي، لي فيها تركيا وايران والسعودية وغيرها من الدول الافريقية والعربية.
التظاهرة ديال منظمة التعاون التسلامي غاتكون ما بين 26 يناير و 31 يناير الجاري، بمشاركة الوفد المغربي لي فيه ممثلي عن أحزاب في الشعب داخل مجلسي النواب والمستشارين.
دبا اللي كاين هو ان المغرب رفض سياسة المقعد الفارغ واخا منظمة التعاون الاسلامي باغي يتحكم فيها محور الممانعة أو المحور ديال ايران وتركيا والدزاير، فالمقابل يضربو محور التطبيع مع اسرائيل بقيادة المغرب والامارات وبصورة أقل السعودية.
هاد التظاهرة واخا معندها تا معنى سوى كثرة البلاغات والهضرة، ولكن الرباط بغات تحافظ على مكانتها القوية في علاقاتها مع باقي الدول الافريقية والعربية خصوصا فيما يتعلق بالتعامل مع القضية الفلسطينية.
دبا السؤال هاد البرلمانيين اللي غايمثلو المغرب فالجزائر، واش عندهم اطلاع بالدبلوماسية وعارفين اش واقع، وكيفاش خصهم يتعاملو مع الوضع فالجزائر؟. الجواب هو موحال حيث الاختيار مبني على التوزيعة الحزبية فالشعب داخل البرلمان، طبعا باستثناء بعض الكفاءات لي فهاد اللجن، اضافة بلي الوفد غايكون مرافق من متخصصين في الادارة .