كود" تنشر حلقات من محاكمة لمجرد. الحلقة الثانية: لورا شافت فسعد ديك الليلة جوج ديال الشخصيات، اللولة لي ضريفة بزاف والتانية شريرة عامرة بالغضب وكاتلدد بالعداب ديال واحد آخر

تم النشر في "گود" بعد موافقة شخصية من كاتبة الحلقات نهال المنصوري
الجزء الثاني:
لورا كاتقول بلي ملي دخلات معاه للبيت حيدات صباطها من الأدب حيت البيت كانت دايزة فيه الزربية كامل و مابغاتش توسخها. و حيدات الشال ديالها حيت البيت سخون.
سعد كايقول بلي ملي حيدات سباطها و شال ديالها فهم أنها باغا تنعس معاه ههههههههههههههههههههه
لورا كاتعاود بلي جلسو فالأرض و سعد باسها و تاهيا باستو بالإرادة ديالها حيت عجبها و لكن ماكانش الغرض ديالها هو يديرو علاقة جنسية حيت يالله تلاقاو و مازال خاصهم يعرفو بعضياتهم كتر باش يقدرو يوصلو لهادشي.
المهم و هوما كايتبوسو، سعد زدح ليها راسها معا الأرض. هي مافهمات والو وصحاب ليها فاللول بلي الحركة تدارت بالغلط. ولكن عاودها و ملي بغا يعاود يبوسها ضورات وجها حيت مامتافقاش على هادشي. هو جعر ملي مابغاتش باقي تبوسو. طلع جلس فوق منها و شدها بزز و ضربها و حيد ليها حوايجها و حيد حوايجو و هو فوق منها.
اغتاصبها. وقع الإيلاج مرة وحدة حيت هي بدات كاتقاوم، قجاتو و قجها، بداو كايبانو ليها النجوم و صحابليها صافي غادي تموت. واحد الوقيتة قدرات تزلق ليه و هربات لطواليط و سدات عليها.
جلسات فالطواليط تكالمات و غسلات فمها من الدم و جمعات القوة ديالها باش تخرج تهرب.
ملي خرجات من الطواليط لقاتو تكالما و ولا إنسان وحد آخر. كاتقول بلي شافت فيه ديك الليلة جوج ديال الشخصيات، اللولة لي ضريفة بزاف و كاتهز ليك الهم على حوايج بسيطة بحال واش فيك العطش ولا بالبرد، والتانية شريرة عامرة بالغضب واللي كاتلدد بالعداب ديال واحد آخر.
لورا قالت بلي ملي شافت الشخصية اللولة رجعات، بدات كاتساوي معاه باش تلبس حوايجها و تاخد تليفونها بلا صداع و تهرب بحالها.
و هي كاتلبس حوايجها، سعد مد ليها 150€ و دبليج ديال النقرة. مابغاتش تشدهم و لكن هو بغاها تاخدهم بزز. من بعد طلب منها الزواج، و هي قاتليه ماشي هاكا كايتجوجو الناس، قاليها غادي تكوني سعيدة معايا و غادي نولدو الدراري. وهي تقوليه أنا مايمكنش نتجوج بيك نتا وحش. هنا سعد عاود جعر و بدا كايضرب فيها و كايحاول يعاود يحيد ليها حوايجها.
لورا هاد المرة حيت كانت واقفة، دغيا قدرات تهرب ليه.
ملي خرجات من البيت، لقات فالكولوار جوج ديال الناس خدامين فلوطيل. شافوها تخلعو حيت مضروبة و حوايجها مقطعين. تعرضو ليها باش يفهمو مالها، شوية سعد خارج تابعها بسليب كايجري.
السيدة لي كانت كادير الميناج فبيت واحد آخر فليطاج، بالخلعة جراتها للبيت و سدات عليهم.
السيد تعرض لسعد و هبطو لتحت باش يعيطو البوليس.
هاد الجوج ديال الناس شهدو بهادشي كيفما عاوداتو لورا و شهدو بلي لورا كانت مضروبة و تريكوها مقطع من تلاتة د لبلايص. زائد الكاميرات ديال لوطيل كاتبان فيهم لورا خارجة كاتجري و سعد تابعها بسليب.
يتبع...