تقارير الأمم المتحدة و لاَدْرِيسَة د المغرب

أنا بصراحة هاد التقارير ديال الأمم المتحدة لي ديما حطانا أسفل سافلين ، مكتبغيش تدخلي فمخي!!! ديما حنا مكلاسيين يا حدا بوتسوانا يا فوق موريطانيا بجوج ميليمتر يا تحت الكامبودج بطناش ميكروميتر مربع … وآآ بزآآف .. !!! هو فالحقيقة صحيح انه البلاد معندنا فيها لا تنمية لا خدمة لا أحزاب لا سبيطارات ، لا مدارس كتفرح لا جاردات فين يلعبو الدراري باستثناء دوك “الحدائق” لي كديرهم الجماعات الحضرية وفيهم كميات الزليج والكرانيطو أكثر من مساحة العشب 118 مرة .. صحيح حنا عندنا الطرق كيغرقو فيهم الطوكوبيلات اكثر من عدد القوارب لي غرقو فالمحيط الأطلسي منذ الحرب العالمية الأولى ، وصحيح انا المسؤولين ديالنا دايرين بحال داء فقدان المناعة المكتسبة، مقدرنا نحيدوهم ما لقينا ليهم شي دوا إيفيكاس !! ولكم باش تبقا تجي الأمم المتحدة وتكلاصينا مع اليمن لي فيها المجاعة والكوليرا وشي ميتاين وخمسين حرب نايضة فدقة وحدة والناس تماك مساكن معارفينش راسهم تا معامن شاعلة ليهم !! اوا سمحلي هادشي ميمكنش أختي الأمم المتحدة !!! .. واش غير حنا شفتو عندنا التريبورطور كيهز الهدية ديال العرس بالعروسة ببواها بالمعازيم بالكزار براجلها ديال النكافة ..وكيطلع بيهم دقة وحدة حتى للدروج ديال قاعة الأفراح ..!! رجعتو كتكلاسيونا فالتقارير ديالكم من بعد جنوب السودان .. يا جنوب السودان الناس تماك باقين حتا مجمعو القرطاس ديال الحرب الاهلية من الشارع باش يدوزو الطوموبيلات ديال الأمم المتحدة !!! صافي وليتو تكلاصيونا من ورا ليبيا يا أعداء الله !! ليبيا لي حاليا مفيهاش كاع حتى الدولة …و اصلا مكنعرفو حاليا تا واحد فليبيا باش نهضرو معاه نسولوه واش بصح مزال كاين ليبيا فالخريطة ! و لولا الجزيرة الله يجازيها بخير كتجبد لينا واحد سميتو الجينيرال “حفتر” مزوق كله بالنياشين ديال الحروب لي تفرج ليها فالأفلام ، جنرال داير بحال بواها ديال البطلة فشي فيلم هنداوي غيتسالا بالعرس لولاه ..كاع مكنا نعرفو واش باقين كاينن الليبيين فليبيا …!!!
بكل صدق هادو لي كيصاوبو التقارير ديال الأمم المتحدة يا إما معندهمش اللادريسة صحيحة ديال المغرب!!! .. يا إما كيجيو وكيلقاو رئيس الحكومة مشا يصلي الجمعة ،وكيعمرو لينا الغياب فالتقرير .. إوا تكايسي علينا أختي الأمم المتحدة ياك لاباس !!
#عطيونيشمن ساعةغتجيو العام الجاي عفاك أختي !!!