أحمد رضى بنشمسي مدير مجلة نيشان سدو لينا نيشان الله يعطيهم اللقوة

س: أش هادشي أسي بنشمسي ، مالك سديتي نيشان ؟؟؟
ج : واش انا اللي سديتها، ها العار ما قيلني عليك تا أنت ما تزيدش الطلع ليا الخ...ر لراس، راني كاعي ديال بصح و محاملش الهدرة فهاد السيجي ديال ( طييييييييت )
س: وشكون سدها بالسلامة ؟؟
ج: الشماية اللي ما يقدروش إديرو المواجهة فاص، مشاو دربو الدورة و دارو معنا سياسة بني كلبون، عوض ما يدوزونا المحكمة باش هي اللي تسد المجلة، قطعوا علينا البزبوز ديال الإشهار، و الشركات لكبار فلبلاد ما بقاتش بغا دير الإعلانات عندنا، و دربتنا الحزقة و تا دوك جوج دريال ديال السوكور اللي كنا دايرين أكوطي تسالاو و مابقاوش
س: و علاش ما سدوش البزبوز ديال الإشهار على المساء ديال رشيد نيني مثلا؟؟؟
ج: علاش غا يسدوه على رشيد نيني و المساء، و هي قيالة كتصبغ فيهم و تخدم المصلاحة ديالهم، بلا شروط، بيني و بينك واش المساء ديال الزفت جريدة صحفية، هاديك راه كارثة في مجال الصحافة فالمغربي، و زايدون خلينا غير فنيشان ما نقص صداع مع داك الباسل
س: واسمح ليا أسي بنشمسي تا أنت فيك الديفو، كا تقيل تنبش فمالين الحال و صحاب الشركات الضخمة و بغيتهم إدروا عندك الإشهار هادي هي دربني و شكا سبقني و بكى؟؟
ج: واشفتي الدصارة ديال والو عاوتني، زعما قلنا بأن عقلية المخزن تبدلاة فالبلاد و الناس ديال المخزن و لا عندهم نضج، ولاو كايرضاو بنادم ينتقدهم، خصوصا أنه مستحيل داكشي كولو اللي كا يديرو إكون صائب، و كنا نعتقد أن المسألة الإقتصادية بعيدة على السياسة، و ماشي شي داخل فشي، خصوصا أن المجلة كانت في المرتبة الأولى في المغرب، و بتعرابت و بلا دوك المصطلحات ديال الإقتصاد، تا هوما كانو رابحين بالإعلان ديال المنتوج ديالهم فنيشان حيث كان تا يوصل لعدد كبير من المواطنين من كل الشرائح
.
س: هي تا أنت من دوك اللي كانو كا يعتاقدو بأن المغرب ولات فيه حرية التعبير؟؟
ج: الصراحة أه، قلت صافي راه ضربنا أشواط فهاد القضية ديال حرية التعبير و مشا زمن قمع الصحافة و الحرية ديال التعبير، ولكن بان ليا مكاين لا أشواط لا تا لعبة مزال القاضية هي هي و المخزن هو هو، غير بدل الطرق ديال التعامل و صافي
س: دارو ليكم عامرة فخاوية و صافي
ج: داروها لراسهم إلى تسدات نيشان، فامنا عمرهم ما يتسدوا و أقلام ديالنا غا تبقى ديمة تكتب ، هادوك راه ما كيفكروش معرفينش بأن المسألة قضية مبدأ
س: شي خبار داير فالسوق قالو أن نيني غا يدير شي مجلة بحال الستون ديالكم؟؟؟
ج: يدير تا عشرة و أنا مالي، على العموم صعيب عليه إدير مجلة بحال نيشان، واش جاب الطيارة لحمارة. و من الأحسن يمشي إنيني راه عاقو به الناس
س: دبا صافي غير نتولفو بلا نيشان ما كين تا أمل؟؟؟
ج: مكاين لا أمل لا فطيمة لا عيشة، اللي دار الله راه دارو صافي سالينا من 2006 و حنا كا نقاومو و ندابزو مع الوقت، صافي ما بقا لا جهد لا فلوس
س : أش مصير الباتول لفضولية و الصحفيين اللي كانو خدامين معاك؟؟؟
ج: الباتول راك عارفها كيف دايرة ما غتسكتش و ما غا تستسلمش راسها قاصح، أما بالنسبة للمصير ديالهم، بلا ما تخاف عليهم الدراري و الدريات اللي كانو معنا كلهم مجهدين في الميدان الصحفي و إحترافيين غا يدبروا إدبروا على راسهم باش ما كان
س: إو الصحفيين غا يدبرو على راسهم و القراء كغايدرو اللي مولفين نشان؟؟؟
ج: إوا إكمدوها و يصبروا، كيما دايرين حنا دبا، وخا القضية صعيبة و لكن ما عندنا ما نديرو الخوت
س: الناس ديال البيجيدي و الخوانجية فرحوا و تشفاو فيك بالمزيان
ج: ماشي غير هما منهم عداد اللي فرحوا و بقاو تيتشفاو فينا، محيت كنا دايرين لهم العصا فالرويضة و زامتينهم بالمزيان، دبا غا يلقاو راحتهم و غا يديرو ما بغاو بلا ما يدوي معهم شي حد
.
س: شي كلمة أخيرة
ج: ما عندي ما نقول غير سدوا لينا نيشان الله يعطيهم اللقوة
في الأخير نشان راه غا تبقى ديما في عقولنا و في قلوبنا و خا دارو ليه راو داو
ملحوظة: هذا حوار مفترض مع مدير مجلة نيشان اللي وقع عليها خنق إقتصادي ما أدى إلى توقفها