شوف السي أش سماك الله. -حميد -شوف أحميد.. راه واخا تكول اللي كلت راه الفلوس هم كلشي... شوف ع المشاريع فالمدينة مالين الفلوس اللي مشين الحركة أو فاتحين شحال من بيت... -أش فاتحين، الصناكات والقهاوي والهريات، مالهم دايرين وزينات ولا شركات كبرى اللي ممكن تخدم أكبر عدد ديال الناس... أو عاطينهم حقوقهم باش يعيشوا كناس. ياك مخدمينهم بجوج ريالات، لا ضمان اجتماعي لا تغطية صحية لا والو. وقت ما رشقت ليهم يجريو عليهم... وريني شواحد لاباس عليه، كينتج فهاذ البلاد.. شوف طلعت حرب فمصر هو اللي خلق ميدان كد الخلا، الانتاج الإذاعي والسينمائي، مخدم شعب ... ومكتسح سوق دولية... -اشكون هاذ طلعت حرب... -طلعت حرب معلم كيبيع الحوت فالمحافظة. -كتطنز علي. -والو والو. أنا ع داوي... -أو انت من الصباح أو تا تسول في. أش دير بالفلوس...؟ انت أش غ دير بالفلوس؟ -آسيدي نبني دار فين نسكن، أو نشري طوموبيلا أو ندير شي بيعة وشرية... أو الفلوس تجيب الفلوس أو نولي ملياردير. أو عاد كاين بلانات اخرين. نترشح الانتخابات. ندخل فالعقار نولي نبيني ونبيع... شلا شلا ما يدار ديك الساعة... أو الوليدات ندخلهم المدارس الخصوصية. ونصيفطهم يقراو فمعاهد عليا... وندير ما يديروا الناس... -أو من بعد ملي تجمع هاذ الفلوس وتولي مليادير أش غدي دير.. -الدراري يعاونوني فالمشاريع والبنات نزوجهم من أغنى الأغنياء... وندير علاقات ونولي الفوك الفوك... هاذا الشي كله إيدروه الفلوس... الفلوس أوليدي كتفتح الطريق فالبحر... أو كدير الهيبة.. والشان والجاه ويلويو يخافو منك، ويضربو ليك ألف حساب أو حساب.. -أو ذاك الشي اللي كلت تانا... وعلاش بارك تصدع لي راسي من الصباح. ها فرنسا ها الليفر .. ها صلعة حرب. -طلعت حرب -كصلعة حرب كطلعت حرب الله يرزق ع الصحة والسلامة. -أو فين المشكل... -راني داوي معاك بعقلية واحد ما عندوش الفلوس، نهار يوليو عندي. راه هاد الشي اللي كاين.. كفاش أش تسحاب.. راه راسمالنا ع هضرة.. أو زيدون أنا ع داوي... واللسان ما فيه عظم. واللي زربو ماتو... وما تمشي غير فين مشاك الله بالفهموم الشعبي المغربي ماش بمفهومها الصحيح... ما فينا ما يجبد علينا النحل. راه كاين شي وحدين ماعْمر جبهتوا جات اللأرض ولا تفرج فهاذ العرض كيخرج بنتيجة وحدة. هاد السيد كيتهكم على الدين وكيخدش الحياء الواحد ما يتفرش مع وليداتو. أو هو كتلقاه صايك الطومبيل أو غادي مع وليداتو أو السبّان في الراجلين أو مالين الموطورات الله ينعل تيط.. سر يا ولد تيط.. تا هذا مالو أ يحرق تيط شو منين دايز الله يلعن ط طيت طيت طيت طيت ... أش كاين أش كاين شي حريق.. لا لا عواحد المومن فالطومبيل كيخدش أو كيكمش فالحياء كدام وليداتو بلا حيا بلا حشما.. بلا فتيل حبل... إو ما عندنا غرض... لا تديوش علي راه اللسان ما فيه عظم . وأنا ع داوي.. وكنظن بركة، دوينا بزاف، أو دخلنا فالسواقات اللي بعيدة منا... فالحقيقة دويت بزاف انتم عا ساكتين أو دخلت فالسواقات اللي بعيدة مني. وأنا ع داوي سامحوني أخوتي أو ماديروهاش من قلت الصواب راه اللسان ما فيه عظم. وتخيلو معاي اللسان كون ما كان فيه عظم أعوذ بالله من الشيطان الرجيم رجعت تاني، المهم أخوتي دوزوا بخير وإلي شافش واسمع يكول الله يستر. ا
