في أول حوار له العاقل بنتهامي عامل الناظور، كيفرغ قلبو و يكشف المستور بلافران.كوم/حاوره: بركاك الحومة بلا فران ألو ألو و ألو السي العاقل بن تهامي ،كتسمعني ولا؟؟؟ بنتهامي واه واه شكون معيا بلا فران تسوارد شا نتمازيغت ما؟؟؟ بنتهامي أودي فين هيا تمازيغت نسقارقوب شوية وها، تلفات ليا مع عشت بزاف فتمارة و النواحي ديال الرباط . شكون شكون بعدا معايا و أش هاد الزربة الخايبة. بلا فران مكاين ني زربة خايبة لا والو.راه معاك بركاك الحومة المراسل ديال بلا فران، باغي إدير معاك شي حوار أوصافي؟؟؟ بنتهامي بلا فران لواه بلا جراير هادا، ياك ما نتوما لي درتوليا ديك التصويرا كنزير فيها السمطة . بلا فران إيه أمعلم حنا هما هادوك بنتهامي إوا ياله فكني أسي لبركاك، و لا معرفت كي سميتك، راها مورنا لخدمة . بلا فران ماشي حشومة عليك خليتي القوات المساعدة يسلخو الدراري المعطالين، و ضربو تا لبنات و ذاوي الإحتياجات الخاصة ، لفتيت كان كيهدم الديور نتا جيتي تهدم بنادم زعما نتا عاقل ؟؟؟ بنتهامي شفتي عارف إلا نتوما باسلين فهاد بلا فران. راه ما شي شي عصا. راه غا درنا ليهم شوية ديال المصاج و صافي، و بنادم هو لي إخرج عينيه من النهار الأول. بلا فران ولايني راه هادوك رجال و مناضلين ديال بصح، ماشي ديال الميكة و راه و كلتوهم لعصا من بعد 48 ساعة خرجوا عاود لشارع.؟؟؟ بنتهامي إوا أش غانقوليك، تا لهادي أن منقدرش ليها. بلا فران ندوزو ليك هادي ،وخا الصراحة ما درتي فيها ما يتشاف أسي العامل. مؤخرا ستقبلتي الدراري ديال إثري الريف لكرة السلة و هدرتي معاهم، كيما سمعنا واعدتيهم بالمساعدات، واش هادشي بصح ولا غير داوي خاوي بحالك بحال لي فاتو؟؟ بنتهامي لا لا أنا داوي عامر ماشي خاوي، غاندبر ليهم شي تقرقيبة داروري، أنا نيت عزيز علي الباسكيت. بلا فران و ناس ديال الكورة أش غادير معاهم ، و داك التيران ما فيه ما يصلح ؟؟؟ بنتهامي إوا إسلكو فداك التيران تا يحن الله، راه هادشي لي كاين هاد السعة، و في الحقيقة راه بداك التيران كيربحوا، كيعاونهم بزاف، راه لبارسا يغلبوها فداك التيران. بلا فران ديك لمرا شفناك نازل من سيارتك، و كانت وقعات واحد لكسيدا و بديتي تنضم السير كيفاش هاد لبلان.؟؟؟ بنتهامي أودي أش غانقوليك ملي أنا صغير كان الحلم ديالي نولي بوليسي، ندير السيركولاسيون و لكن وليت عامل أش غادير، و مرا مرا كنستغل شي مواقف باش ندير المهنة لحلمت بيها. بلا فران إوا و لمسرح تا هو عزيز عليك، شفناك حضرتي في الدورة ديال هاد العام لي كتنظم الطفولة الشعبية و قليل من العمال لي دارها؟؟؟. بنتهامي إوا بغينا نشطو شوية معا الناس دناظور، مع جابو الشيخ موسى نهار الافتتاح منعاودش ليك كانت زاهية. بلا فران زهواني مع راسك، نتا تنشط و المعطلين توكلهم الهرمكة.؟؟؟ بنتهامي عاود قضية المعطلين. بلا فران وخا أسيدي نمشيو لحاجة أخرى.ما حشمتي ما والو أسي بنتهامي، نهار جلستي قدام أبرشان في لقاء حول البيئة و الشواطئ، و هو لي إدارة المياه و الغابات رفعت 32 دعوى قضائية ضده، تتهمه فيها بنهب الشواطئ و قلع الغابات و تخريب البيئة؟؟ بنتهامي إوا أش بغتني ندير أنا. القضاء مزال ما حكم عليه ، نهاز الزرواطة و نجري عليه من داك اللقاء. راه ما عندي ما ندير أنا. عاود لقاء داز و صافي راك عارف داكشي ديال الهدرة. بلا فران دبا نتا علاش جيتي لهاد الناظور يعني شنو غادير و شنو غا تبدل؟؟؟ بنتهامي وراه كلشي مقربل عندكم فهاد المدينة السعيدة، ما عرفت منين نبدا ،واقيلا تا أنا نكملها في التقربيل و صافي. بلا فران ياك أمعلم هادي عندك زوينة، إوا على ذكر التقربيل، ما شفتيش بلي البلديات ديال الإقليم كاملين مقربلين و خصوصا ديال الناظور؟؟؟ بنتهامي أنا سوقي. خليهم مقربلين نيت، باش ما يبرزطولناش. فيهم شي وحدين الحفيظ السلامة و صافي لبسالة 10 ل 0 بلا فران باين وصلاتك خبار طارق عليها قولتي هاد لكلام ،محيت هو معروف و راه ديما شاد الضد مع العمال؟؟؟ بنتهامي لا والو ما وصلني تا شي خبار، غير هو أنا قاد بشغلي و ما بغيش شي حد منهم يجي يبقا يدير ليا دوك الدروس دوالو. بلا فران واليني نتا ريفي مخزز، ياك ما تانتا عوال الدير بحال لفتيت تبدا تخرج داك الطراكس يهدم لينا فالديور ديال الناس؟؟؟ بن تهامي و معرفت فيمن غا يخرج لبلان أمعلم، إلا خرج في العمالة نيت غنهدم بباها. بلا فران و الناس ديال تمارة قالو لينا راك زوين و ظريف؟؟؟ بن تهامي إوا و الناس دناظور مخاصهمش الظرفات، هادشي لتتقول التقارير. بلا فران هاي هاي هاي، علاش تا حنا عندنا التقرير ،راه حساب لينا داكشي غير غادي هكاك بتسير الله؟؟؟ بنتهامي واش اللعب هذا. راه حنا واعرين أشمن تسير الله، مكاين غير التقارير على الشادة و الفادة فلمدينة. بلا فران هي عارفين شكون خدام نيشان و شكون عاطيها لشفرة و التخرويض؟؟؟ بنتهامي هههههه فهاد البلاد كلشي عاطيها لتخرويض، قليل لخدام نيشان و لكن أنا جيت باش نسكدهم شي شوية. بلا فران أه نسيت ما قوتليكش، عندك شي خبار على الصحافة ديال الناظور؟؟؟ بنتهامي قالو ليا راه بزاف بيكم ، و عاطينها غير لتصاور، وصاوني مزيان قالو ليا حضي راسك راه دير هاه و لا هاه ما غيزكلوكش بلا فران كان كيسحابك تمارة هادي راه الناظور أمعلم. تا إلى كانت الصحافة غايبة راه كاين مالين الحسنات تايوصلوها سخونة. بنتهامي داكشي لبان ليا نيت، كل مرا كانشوف شي تصويرة ديالي فشكل. بلا فران على ذكر التصاور. عينا كنقلبو ليك شي تصويرة تتبان فيها مخنزر. ما لقيناش ديما ضاحك ياك ما كتكتر من لافش كيري؟؟؟ بنتهامي إوا راك عارف ديما قدام الكاميرا الضحكة الصفرة خاصها تكون، وأنا عندي مع كيري أما لافش خليتها ليكم بلا فران أشوف أشوف، أبنتهامي الروشارج غا تسالا، بقليك دقيقة قول فيها شي حاجة؟؟ بنتهامي الله يعطيك الدل مشارجي 20 درهم و باغي دير معايا حوار ياه على قرزاز مكتحشمش أصاحبي راه مزال كنت باغي نفرغ عليكم قلبي معا راه عامر من جهتكم. بلا فران طيت طيت.. قد نفذ رصيدكم يرجى تعبئة بطاقتكم. (هذا الحوار افتراضي ماشي ديال بصح)
