الثلاث اللي فات صوت أعضاء لجنة المالية بالإجماع على تعديل تقدمت به فرق الأغلبية البرلمانية في مشروع قانون مالية 2023، يقضي بالرفع في الرسم عند الاستيراد المطبق على السجائر الإلكترونية من 2.5 إلى 40 في المائة. هاد الشي كيعني ان السجائر الالكترونية غادية يرتافع ثمنها بزاف. تبرير التعديل جا فيه "استهلاك السجائر الإلكترونية في المغرب عرف ارتفاعا ملحوظا خلال السنوات الأخيرة، لذلك تقترح الأغلبية رفع رسم الاستيراد من 2.5 في المائة إلى 40 في المائة على السجائر الإلكترونية والأجهزة الكهربائية المماثلة بهدف الحد من انتشارها". لكن اللي وقع ان شركة فيليب موريس رابحة من هاد التعديل وبزاف. حقاش ارتفاع الرسوم الجمركية شملات غير السجائر الالكترونية اللي كتلاح "جوتابل" اللي كتسمى "الڤابو"٬ والغريب فهاد التعديل ان ماركة الكترونية من گارو الشركة العالمية "فيليب موريس" اللي كتباع ما بين 400 و1200 درهم ما غادياش تقاس فالرسوم الجمركية. ما مسوهاش لا فرق الاغلبية ولا فرق المعارضة فمجلس النواب. الشركة الامريكية عندها دابا ماركة من هاد الگارو اسمها "ايكوس" وغادية دخل ماركة جديدة "ايلوما". كتسنى غير تبيع اللي باقي عندها وصافي. هاد التعديل كيعني ان لمگردين من لمغاربة هما اللي غادي يتزاد عليهم الثمن وبزاف بعد رفع الرسوم الجمركية على استيراد "الڤابو"٬ اما لملايرية واللي مقاد شوية ما غادي يتزاد عليه والو. هاد الشي ماشي عا تا جا. فيه لوبي كبير وكبير بزاف خدام فوزارة الصحة بلا حيا بلا حشمة من خلال اطباء بلا ضمير كيدافعو على هاد النوع من السجائر وفيه نواب كيدافعو على هاد الماركة وفيهم حتى شي صحافة كتسوق لهاد الماركة. اللوبي عندهم خدام مزيان فبلادنا وكلشي عارف هاد الشي.
