أكد هشام الدكيك مدرب المنتخب الوطني المغربي للفوتسال، أن المغرب مازال ما تأهلش لدومي فينال كأس إفريقيا واخا ربح الجوج ماتشات الأولين من دور المجموعات ضد غانا وقبل منها زامبيا، وقال بلي خاصو يربح الماتش الجاي ضد زامبيا باش يتكاليفا. وهضر هشام الدكيك بعدما ربح المنتخب المغربي منتخب غانا بثمانية أهداف مقابل 3 فالجولة الثانية من دور مجموعات كوب دافريك، ووضح: "حسابيا مازال المنتخب المغربي للفوتسال ما تأهل لدومي فينال كأس افريقيا واخا عندو 6 بوان وربح جوج ماتشات، وحسب الدكيك فالمغرب خاصو يربح زامبيا فالجولة الثالثة والأخيرة من دور المجموعات باش يتأهل إلى الدومي فينال كأول المجموعة الأولى، والماتش ضد زامبيا غيكون صعيب بزاف حيث حنا عندنا 6 النقاط وزامبيا عندهم 3''. وبخصوص مباراة غانا قال هشام الدكيك: "الماتش كان صعيب شويا وحماس اللاعبين كان زايد شويا والفريق الغاني ما كان عندو ما يخسر حيث ديجا خسر الماتش الأول وخلق لنا بعض المشاكل ودرنا شي أخطاء ولكن فالشوط الثاني رجعنا للعب والهدوء ديالنا وما تماركا علينا حتى شي هدف واللاعبين ديالنا ولاو حافظين الخصوم، وتعطلنا باش ندخلو فالماتش ومن بعد قدرنا نماركيو وكنا نربحو بنتيجة أكبر". وكمل الدكيك: "الجمهور فالفوتسال مؤثر حيث الصوت ديالو كيوصل مباشرة للاعبين، غير هو الحماس الزايد اللي خلا التعليمات ديالنا ما توصلش حيث اللاعبين باغيين يلعبو مزيان ويماركيو ولكن الخصم ما باغيش يلعب وواقف فلازون ديالو وكيتسنا الأخطاء ديالنا وحاولنا نكالميوهم ونصححو الأخطأ ديالنا وهذا الشي بان فالشوط الثاني فين قدرنا نوصلو للشبكة ديال الغانيين والمهم عندنا هي ردت الفعل". وزاد مدرب المنتخب المغربي للفوتسال وقال: "حنا داخلين لهاد البطولة كمنتخب مرشح باش يربح اللقب، وداكشي علاش الخصم كيكون موتيفي بلاما يحتاج للمدرب ديالو يموتيفيه، واليوم ربحنا بثمانية وما عاجبناش الحال هذا راه فخر لنا ومع ذلك كنحسو بريوسنا بلي كنا نكونو احسن".
