سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
ماشي غير الملك اللي ما كيحملش يدي معاه الصحافيين لمغاربة فصحف مغربية مزوار حتى هو: اقصاهم من قمة واشنطن ودا غير الوزرا صحابو واللي ما عندوش معاهم خلاهم وصحابو داو صحابهم وبنكيران فدار غفلون
ماشي غير محمد السادس اللي ما كيديش معاه الصحافيين المغاربة اللي خدامين فصحف مغربية وكيخلصو الضرائب للمغرب وزير الخارجية صلاح الدين مزوار حتى هو عندو مشكل كبير بزاف مع الصحافة المغربية. اخر ما دا كان هو مدير نشر "صحيفة الناس" اللي داه وجرو للكوميسارية بدعوة رفعها ضدو. الوزير ولا ناس وزارتو اللي تكلفو باعداد لائحة المشاركين في القمة الامريكية الافريقية بواشنطن حيدو الصحافة المغربية. مزوار من نهار اللي جا وهو كيتكلم غير مع البراني اللي كيطبل ليه . القمة مهمة بزاف عليها يمكن للصحافي يوقف على واش المغرب بصاح خدام على ما يردده منذ سنوات "القضية الوطنية الاولى: الصحراء". خاصة ان الجزائر محيحة بزاف فافريقيا وحتى امريكا بدات تبدل مواقفها واحدى منظمات هذه القمة سوزان رايس /الامن القومي/ اضحت داعمة للبوليساريو.
الوزير دار غير صحابو الوزراء دا معاه التجمعي ولا اللي رجعوه تجمعي بزز منو وزير الصناعة والتجارة حفيظ العلمي /حضورو مفهوم/ وهاد الاخير دا معاه بوهدود وزير منتدب فالاقتصاد غير مهيكل وحتى هو تجمعي وما معروفش علاش مشى وما داش معاه وزير الفلاحة والصيد البحري وهذا واحد من القطاعات اللي المغرب خدم فيهم وولاو نموذج للتعاون جنوب جنوب. يمكن ما بقاش عندو مع عزيز اخنوش.
وكاينين شي وزرا داو معاهم شي وحدين ما عندهم علاقة لا بافريقيا ولا بامريكا.
الكارثة كبيرة ان مزوار دار ما بغى فاللائحة ودا اللي بغى من رجال الاعمال ...هاد الشي كلو بلا خبار رئيس الحكومة عبد الاله بنكيران حقاش وفق ما علمت "كود" تمثيلو للملك كان حتى الايام الاخيرة عاد تحسم.
هاد السياسيين دياولنا خاصهم يعرفو باللي يمشيو الصحافيين ما شي خير يديروه فيهم حقاش كل جريدة بغات شي واحد يمشي غادية تكلف بيه، ولكن باغيين ديما يخبيوا على شوهتهم وعلى اخفاقاتهم وما يبينو الا الايجابي هاد الشي علاش كيديو معاهم الاعلام الرسمي المطبل لهم
