— هاد مواقع التواصل الإجتماعي والمواقع الإخبارية والجورنالات كيعيشونا فالوهم، هادي شي سيمانة مكاين غي الهدرة على الإضراب العام، وأنه غادي يكون ضربة قاضية لحكومة الإسلاميين، شوية بداو كينزلو البيانات ديال المشاركة فالإيضراب، وشي معاه وشي ضدو، وكاين لي مشارك فالحكومة ومع ليضراب، داكشي مرون ومخلط لدرجة أن العدل و الاحسان تا هي مشاركة، ماجابش الله مع عشرين فبراير يجيب الله فهاد ليضراب العام
بنكيران مرة يقول الإضراب حرام مرة حلال، وباش يفشل هاد الإضراب ويضرب الطبقة الشغيلة وعد المغاربة بمفاجئة يوم 29 فبراير، مريدي المهدي بن بركة، تلفو نورمالمون هادا يوم عمل بالنسبة ليهم لأنه ذكرى مقتل المهدي، وكل عام كيطلعو لينا بكاسيطة فين جثة المهدي، وكيبداو يغنيو دوك الدويسكات ديال المهدي مناضيل كبير، كون بقا حي كون لقينا البيطرول، وكون راه حنا عايشين بيخير دابا بحال فينيزويلا الإشتراكية الشعبية العظمى، هاد العام اختلطت عليهم الدعوى ماحيلتهم يبكيو حسينهم ماحليتهم يديرو ليضراب، حيث بكاء المهدي عمل حتى هو واخا عمل موسمي، الصراحة كون غي ردو ذكرى مقتل المهدي فنفس النهار ديال ذكرى مقتل الحسين، باش يلقاو التغطية الإعلامية من قناة المنار و الميادين وقنوات الشيعة فالعراق، راه أصلا يامهدي جايا فالرنة الموسيقية بحال يا حسين، علما أنهم كيتشاركو مع الشيعة فالمازوشية والتضحي وتقديس الأفراد والبكاء والعويل وجلد الذات.
ليوم فقت مع الصباح( الواحدة زوالا)، قررت نخرج نجيب الكيف ونضرب دورة فالمدينة نشوف واش حكومة بنكيران واكلة العصا وواش الإقتصاد الوطني توقف الى حين اسقاط الحكومة أو تحقيق المطالب، ساعة لقيت كولشي عادي بحال ديما، البانكات، وكالات الإتصالات، القهاوي المحلبات المخبازات موالين الحوانت، الخضارة، مول الكيف، مول الشقوفة، مول بيصارة، الطاكسيات الطوبيسات، الحمالة البناية، موالين الديطاي، العاهرات، الفراشة، كولشي خدام والأمور عادية جدا
دخلني الشك و أنا نقول مع راسي ربما غي حيث هادا السونطر ديال لمدينة موحال يكون تأثر بالإضراب كنظن أن مظاهر ليضراب غادا تكون واضحة كثر فالمنطقة الصناعية مثلا، وأنا نتاصل بواحد صاحبي رب عمل أو ربيب عمل كما يحلو له أن يسمي نفسه، حيث هاد خدمة كاتيب مافيها فلوس ولكن فيها الإحترام والمعارف، راه وليت كنتصاحب مع ناس فشكل تعرفو عليا غي من خلال ما أكتبه، الموهيم دورت للسيد، مع البارح كنا كندويو على الإضراب وقلناليه راه موحال تخدمو غدا، وحتى الى بغاو العمال يجيو راه عتلقى حتى الشيفورات ديال الطرانسبور دايرين اضراب، درنا أنه الى كان الإضراب فراه غادي نتغداو مجموعين فشي قنت زين ونشربو شوية، ملي تاصلت بيه ليوم كنسولو، قالي راه خدمنا وتقريبا كولشي خدام فلازون فغونش، وراه مكايناش مظاهر شي ايضراب، وهاد المغاربة عندكم ناقسين شرف وكرامة، ملي كنا ففرانسا كان الإضراب اضراب مافيهش التخرشيش، أما هنا كاين الإيضراب غي فالجورنال.
دورت لواحد صاحبي فرملي فمراكش كنسولو على الإيضراب، قالي راه شي دارو شي ماداروش الموهيم هوما تجمعو ومشاو لأوريكا داو معاهم طنجية و1715، وأراك للنزاهة والتقيتيقات. المهدي الأوستاذ هاداك بدا الإضراب من البارح، تاصل بيا باش نقادو شي بلان( الطاسة و الدريات) وكان كيحمد الله ويشكرو حيث دارو الإيضراب حتى داز الصالير. دورت لواحد موظف فوزارة العدل صاحبي، سولتو على الإضراب قالي هو معندوش الحق يديرو حيث يالله خدم باقي ماجاهش الترسيم، وأن الموظفين لخريين داروه طبعا وراهم منشورين فالقهاوي دابا.
دورت لواحد صاحبي عندهم شاركة عائلية ديال داكشي دطواليطات و الدروكريات ومواد البيناء وبزاف حاجات خريين، قالي حنا من تافراوت، وجدودنا لي جاو من تافراوت وراكموا هاد الثروة عمرهم قالو لينا شي حاجة على الإضراب، قالولينا فقط الى شتو الهايش مايش خرج للشارع على شكل مظاهرة أو اضراب هبطو الريدو، هيث الهايش مايش مافيه تيقة ويقدر يعبر على الحقد الطبقي ديالو فأي لحظة بتهراس أي حاجة بانتلو مايقدرش يمتلكها شي نهار. دزت للمقاطعة لقيتها مفتوحة ولكن خاوية من الموظفين، مخازني واحد لي كاين فالباب دري باقي صغير، شاد التيليفون ومجمع مع عشيرتو( باينة حيث كانت على وجهو ديك تعابير البلادة لي كتخلفها الزعطة على الواحد، وديك التعابير كتعتاري أي واحد منا ملي كيكون كيهدر فالتيليفون وكيفكر فالناموسية، وكيتخايل الدرية طبسيل ديال اللحم بالبرقوق). واحد الأوستاذ آخر صاحبي، دار اضراب فمدرسة الدولة ولكن قرا الساعة لي عندو فمدرسة بريفي.
فالنهاية استنتجت أن هاد لعجب ماشي اضراب عام وانما غي اضراب الموظفين موالين الكوستيمات، حيث أصلا نهارهم طالع وبالنسبة ليهم راه عطلة مدفوعة الأجر، أما صحاب الى ماقفلتي لفورتي، فراهم مساكن ناضو لخدمتهم خاطياهم الهدرة الخاوية والمزايدات السياسية.
