— يقول الله تعالى :" مَّا أَصَابَكَ مِنْ حَسَنَةٍ فَمِنَ اللَّهِ ۖ وَمَا أَصَابَكَ مِن سَيِّئَةٍ فَمِن نَّفْسِكَ ۚ" صدق الله العظيم واخا بعد المرات كتجي الشتا على غفلة مكنكونو موجدين ليها لا قناطر لا طرقان لا تغيير لمجاري المياه، لا بنية تحتية تقدر تتحمل دوك جوج قطرات لي كيطيحو علينا مرة مرة، ولكن كنطلبو الشتا حيث حنا بلاد فلاحية(حسب ماقراونا)، والشتا مهمة للبلاد، وكاتدير الراواج. الشتا ديال هاد المرة، سببات فيضانات كثيرة، ماتو فيها العديد من الناس، للأسف مكانوش مناضلين باش نسميوهم شهداء، وطبعا تعالت الأصوات تطالب بتحقيق فالأمر، وتحميل أحدهم المسؤولية، الله باري منا ومادار غي لي عليه، سيدنا ماشي طاشرون غادي يوقف على كل قنطرة وكل شانطي بيديه، الحكومة ماشي موهمتها أنها تتوسط لينا مع الله باش يطيح علينا الشتا لي على قد قوادسنا،
اذن شكون المسؤول،؟ الشفارة، لي نهبو البلاد ومكيخافوش الله كيغشو فكولشي والمسؤولين لي مكيراعيوش للشعب، والدولة لي مادايراش قناطر وطرقان صحاح لي وقفو فوجه هادشي، هادي هي الهدرة لي كتقال بزاف، ولكن فالواقع راه كاينة شي حاجة سميتها كوارث طبيعية، هاد الكوارث كيجيو لكاع البلدان فالعالم وكيخلفو دمار شديد،
وهنا فين كاينة الحكمة الإلهية، كل دولة على حساب عظمتها كتجيها الكارثة لي تليق بيها، بحال اعصار كاثرينا لي جا لماريكان راه كون جا لينا حنا كون راه باقين غارقين فالغيس من داك الوقت، ماريكان حيث عظيمة جاها إعصار يوازي عظمتها، كذلك الجابون، جاهم تسونامي وزلزال ومخلط داكشي، لي كون جانا حنا كون راه نسبة الدمار عندنا كثر من برلين فنهاية الحرب العالمية التانية، حتى هوما ماتو عندهم الناس وطاحو القناطر،قناطر صحاح وكبار ومبنيين على الصح ككل شيئ أمريكي وبلا غش بلا رشوة بلا وساطة وهكاك طاحو،
وكذلك اغلب الدول لي كتجيها كوارث طبيعية، وبخصوص ظاهرة انهيار الجسور، راه كتوقع عند بزاف ديال الدول ككندا الصين ماريكان، دول لي معندهمش حكومة البيجيدي، ومكيعبدوش الله ديالنا، وطبعا مكيحملوش حكومتهم سباب داكشي، وإنما كيتعاونو باش يتغلبو على الكارثة، كحملات تبرع ومساعدة، ومتطوعين للإنقاذ وشلا حاجات، وهادشي لي كيوقع فأي بلاد فيها شعب بعقلو، ولكن حنا حيث الله يسمحلينا وصافي فراه مكنتقبلوش نحملو الشعب المسؤولية، وديما خاصنا شي علاقة نحملوها المسؤولية.
فالفيديوات لي تفرجت حول الفيضان أو الأخبار لي قريت، كيبانليك أن العديد من القتلى، ماتو نتيجة الغباء ديالهم ماشي بالفيضان أو كان فوق قنطرة ورابت، بنادم كيشوف الواد حامل، ومشارجي باشار فوق القانون، وداخل وسط القنطرة لي كيشوف لما طالع فوقها وباغي يدوز، هذا راه انتحار، ماشي قدر الله، أو غياب البنية التحتية، راه الكلخ لي كيديرها، علاش لي منحملوش سائق داك الطاكسي المسؤولية، علما أن رجال الدرك كانو كيحذرو الناس، وطبعا منصاعوش للتحذير، والنهاية كانت مأساوية بالنسبة ليهم،
القنطرة لي فالخرجة ديال كلميم فطريق ايفني، كنعرفها مزيان وكنعرف ديك المنطقة، ومعروف الواد كيحمل وسبق ليه فاض عدة مرات فسنوات خلت، ولكن مع ذلك الناس ساكنين جنب الواد، آش بغيتي الدولة تديرليهم، راه من ورا آخر الفيضانات فداك الواد، دارو قناة لتحويل مجرى المياه وسط الواد، والحمد الله مامات حتى واحد وهو ناعس فدارو، وانما مات بنادم بعقلو وعينيه وكيشوف الواد حامل وداخل وسطو، وكما شفت أحد الفيدوات، واحد داخل بمارسيديس فاركونيط وسط الواد باغي يدوز، وكان غادي يديه فلت بشوية، بحال هادا شكون لي مسؤول على هاد التصرف الرعواني لي دار، راه خاصو يتشد ويتعاقب، حيث غامر بأرواح الناس، بنادم مصمك جازف بحياتو ومات، وخاص الدولة تديرليه منعرف شنو، راه بنادم ملي كيشوف الفيضان كيطلع للجبل ماشي ينزليه يدوز وسط منو، وزايدون هادي مشيئة الله..
