— نهار الديربي كايدوز كحل زحل على كازاوا و خصوصا الناس لي ساكنين فالاحياء القريبة من التيران ! كاتبدا تسمع غير "عنداك تخرج راه تقدر تلاقا معاهم " " سد بكري و سير فحالك راه قربو يخرجو من التيران " "عنداك دوز من ديك الزنقة راه كاينين تما" هادو هوما الجمل لي كاتعاود على لسان الاغلبية الساحقة د الناس لي عايشين فهاد المدينة ! او شكون هادو ؟ جيش هولاكو؟ مصاصو الدماء ؟ ملشيات الدولة الاسلامية ؟
الى متى ؟ بالعربية تاعرابت حتا لين غاتبقا ساكنة كازا و المدن الاخرى مرهونة بالماتشات و الجماهير لي متابعينها !واش المغاربة زعما ماكايعرفوش يتفرجو فماتش و يفرحو و ينشطو و يدخلو لديورهم ؟ ضروري حنا فكل ديربي تتوقف الحياة و يحبس البيعوشرا و بنادم يدخل لدارو و يسد عليه فحال لا عايشين حظر تجول فولاية الرقة فالدولة الاسلامية ! ضروري البيضاوي و البيضاوية يعيشو داك السبت ولا الاحد محرومين من الخروج فحال لا عايشين تحت القصف ! هادشي كلو لاش؟ حيت واحد كاتلقاه السيمانة كاملة و هو مشوجر فحومتو كايساين الديربي ! و نهار الديربي كايضرب سمطة د النورداز و لا الريفوتريل و كايمشي معيط على خزيت ! خاصو غا معامن ! ربحو مشكلة ! خسرو مشكلة ! تعادلو مشكلتين !بزاف من هادوك لي غادين يتفرجو فالتيران مامشاوش يتفرجو بقدر مامشاو يديفولاو !اه يديفولاو ! و حيت الهايش مايش الحمد الله عندو الطاقة غا مشتتة و مع قلة مايدار لا خدمة لا ردمة العصير فالدرب !ما كايفيق مع الستة باش يمشي للخدمة ماكايبقا فالبيرو تال التسعود د الليل ! فراه الوسيلة الوحيدة لي عندو باش يديفولا هي يمشي يتعرا فالتيران و يردد الجملة الشهيرة "كلشي مقرقب ! كلشي شارب " !و بغض النظر عن النتيجة ايجابية كانت ام سلبية ، ضروري فاش الهايش مايش يسالي الماتش يساليه بخزيت، يهرس و يدكدك باش يديفولا و يخرج الطاقة !و المشكلة الكبيرة انو كايمشيو فيها غير الدراوش ! شي موظف شاري شي داسيا مازوط كريدي يشخشخوها ليه ! شي مول الحانوت مستف شي كوربات د الخضرة و الديسير يسرقوهم ليه !دابا واش الجمهور لي كايشفر البنان جمهور تنظم معاه "عرس كروي" كيما كايقولو فالتلفزة !
و مالنا على حالتنا ؟ على زين الكرة و على زين الماتشات ؟ و على زين الجمهور لي عندنا ؟ ياك حنا ديما لولين فاللخرين ! كانربحو غي بيناتنا ! و فوق هادشي كامل كايخرجو دوك المنظرين ديال حقوق الانسان لي ساكنين فكاليفورنيا و بير قاسم لي ماواصلهمش الصهد د الشيشان يقولو ليك " لاواه راه الرياضة ضرورية للشباب " "العقل السليم في الجسم السليم " تاشمن رياضة ا الشرفا؟ واشمن عقل سليم ؟ واش لي لي عقلو مخلط فيه حشيش و زطلة مازال سليم ! و فمو عامر كالة و الدم ديالو مشارجي يورينكا جسم سليم !! نيجيريا عندهم الملشيات د بوكوحرام و حنا عندنا بوكوخراب! بوكودمار ! و هادشي كامل و كاتلقا les ultras لي خصاهم يساهمو شوية في توعية الجماهير خاصهم يدخلو مع الجمعية المغربية لصناعة النسيج حيت مشغولين بشحال باعو ديال التريكويات و شحال باعو د التيشورتات و الشيلان فعوض مايتشغلو شوية بتنظيم و تحسيس الجماهير!
و كاتلقا الهايش مايش مقرقب و مخدم معاه البوليس و المخازنية و المستعجلات و الاطباء ! و موقف البيعوشرا و حاكم على امة د البشر باش دوز من هاد الطريق و ماشي ديك الطريق حيت هو غادي يتفرج فالفرقة ديالو ! و حيت هو عوال فاش يسالي الفراجة يرجع يشخشخ المدينة و يخرج داك الحقد والغل لي قلبو عامر بيه تجاه الآخر ! الشغب فالملاعب راه صورة مصغرة على شنو يمكن يوقع فكازا و لا فشي مدينة و لا فالمغرب كامل لا خرج الهايش مايش عن السيطرة ! حيت واخا البوليس واخا المخزن واخا بنادم تابعهم بالماطر و السطافيطات فالزناقي و هاكاك باقين حالات الشفرة و الكريساج و التهراس كاينة باقية و تتمدد !
و بالنسبة لهادوك لي كايدافعو على هاذ النوع د التصرفات تحت مسمى الدراري ماعندهمش فين يفوجو و يفرغو الطاقة، ا سيدي لي بغا يفرغ الطاقة يمشي يدفع للكونكور د المخازنية و يمشي يفرغها فلونطرينمو ميليتير و الفياق مع الخمسة د الصباح! و لا يدخل يتريني الفري فايت و لا الكيك بوكسينغ و يبدا يفرشخ و يتفرشخ و هو هاز الدرابو د المغرب.
