— مؤخرا بان واحد الفيديو ديال واحد الاستاذة كاتسب واحد التلميذ و طبعا ناضو صحاب الاحكام الجاهزة و عابو على الاستاذة استعمال كلمات نابية فحال "شد مك ! نسب ليك مك و جداك و طاسيلتك" واخا هوما ماشي شي كلمات نابية دبصح حيت مافيهمش "قلة الحيا" و اصلا بزاف د الامهات المغربيات راه كايضلو يسبو الجدود و الطواسل د ولادهم ! حيت السبان عندنا ثقافة و اغلبية د الناس لي قراو فليسي عمومي راه غايكونو سمعو كثر من هادشي من بعض الاساتذه …
غير هوا و لاعطاء كل ذي حق حقه ,راه كلنا قرينا فالكوليج و الليسي و لي عارفينو انو عمر شي استاذ ماكايفيق الصباح و كايجي معول يسب و يعاير و يحرق دمو !راه الهايش مايش لي معمر الليسيات هوا لي يقدر يخلي عمرو خالد بكل مافيه من هدوء و سماحة و بشاشة يتحول لفاندام مهرس العضام بين عشية و ضحاها ! الناس كايتكلمو على البيداغوجيا و اصلاح التعليم و الدور د الاستاذ و كدا كداشي ! ايه و الدور د التلميذ فيناهوا؟
الدور د الاسرة لي كاتبلز بوزبال و كاتسيفطو للمدرسة ناقص تربية و شبعان عقد و مكبوتات فيناهوا ؟ واش الاستاذ حمق !مقطع السلوكة باش يدير راسو فمراهق مازال مامسح الخرا من زكو ؟ تاقاو الله راه كلنا عارفين الليسيات جامعين التخت د المراهقين المشرملين لي كايتسميهم وزارة التربية "تلاميذ" و كادير ليهم المخططات الاستعجالية و كاتحارب معاهم الهدر المدرسي ! و كاتعطيهم مقعد و استاذ …و هوما فيهم بزاف د العناصر اصلا ماكايمشيوش للمدرسة باش يقراو !واش واحد مراهق الاسرة ديالو اصلا فشلات تربيه مدة 15 و لا 16 لعام و غلب مو و باه و طاسيلتو! و شبعان عقد و مشاكل و راسو عامر فايسبوك و زطلة و كالة ، و الحلم ديالو هوا يضبر فساطة مزيانة و يديها لشي برتوش و يشري موطور و يكابري بيه فالشاريع و الصاطة ديالو راكبة موراه و طالقة سوالفها و الطابلية بيضا كاتفرفر مع الريح ! باغي يكمي تاهوا و يتحشش و يفتخ باش يبان راجل قدام صحابو و ولاد دربهم …
المراهق مابغاش يقرا راه كايمشي للمدرسة غير "بريستيج" و "داير الخاطر لميمتو " اما هوا من غدا لابانت ليه شي طريق خرا تسلكو راه والله لازاد ضرب فيها الضربة!كيفاش يقدر الاستاذ يتعامل معاه و هو محتاج بعدا طبيب نفسي و مساعدة اجتماعية باش يسمعو ليه و يفهموه. لي بغا يعرف حال الليسيات فالمغرب و يفهم النفسية د المراهق المغربي يدخل لشي قسم و يتفرج فدوك الطابلوات المرسومين فالحيوط بالفوتر ديال الز**** و الق**** ! ماكايناش الطبلة لي فشي ليسي مامحفورش فيها ز* !هادا ان دل على شيئ فانما يدل على ان المراهق فديك السن الحساس و الضغط د المجتمع و الظروف لي كايعيش فيها راه راسو مرسوم فيه داكشي لي مرسوم فالحيوطة د المؤسسات ,و ماشي عامر بالابيات الشعرية د ابو القاسم الشابي و لا المعلقات د كعب بن زهير !
المدرسة فالذهنية د التلميذ راه سجن ! حيت مافيهاش فايسبوك و مافيهاش يوتوب و خاصو يسكت و يسمع و يكتب و يعقل و هادشي بالنسبة ليه هوا راه كتييير و صعيب حيت هوا ولد ماماه لي كايفيق و يلقا الفطور واجد و ينعس مغطي فكاشة مازافيل مكونيكطي فالفايسبوك و كلشي كايجيه واجد تالعندو. و حيت المدرسة كاتبان ليه سجن فراه خاصو يخلق السعادة تما و يقتل الملل لي كايحس بيه! و كيفاش غايقتل الملل ؟ بالضسارة على الاساتذة، حيت فهاد الوقت راه باش تكون داخل سوق راسك و كاتقرا راه ولات معيورة بين الدراري !خاصك تبان خاسر و مشرمل و باسل باش تفرض الاحترام ديالك فالليسي و تكون "راجل" ، و القرايا راه ماكايعرفهم حد واش كاينين و لا ماكاينينش حيت فهاد المرحلة فحياه المراهقين القراية راه ماشي نقطة قوة ! ايه نعام ا سيدي هوا بغا يبان مشرمل و صافي داكشي د القراية و المستقبل والحياه و ماكايعتارفش بيهم هوا فهاد المرحلة اصلا.
و فوق هادشي كامل كاينوضو الكوسالة لي باينين عمرهم هزو يديهم و شاركو فالقسم يعيبو على استاذة انها تتعصب و فلحظة غضب دير ردة فعل! فحال لا زعما هي مصنوعة من الكارطون و ماشي بنادم! واش الاستاذ كايتخلص جوج دريال باش يقري ميا د الباشار و لا باش يربيهم ؟ و لا باش يعالجهم؟ و كلا واحد فيهم موراه قصة و ظروف و يجي كاري حنكو لي ماعمرو داز من المهنة د استاذ يطالب الاستاذ يلعب الدور د سبارطاكيس محرر العبيد, و يتعامل مع الهايش مايش باسلوب حضاري! كونو شوية واقعيين راه الليسيات لي ولا كايدخلهم بنادم هاز ساطورة و ضارب سمطة د نورداز خاصهم فرقة "خطر" على وزن فرقة "حذر" و شوف تشوف واش يلقاو السلاكة مع الهايش مايش!
