نور الدين عيوش كيعرف ماشي غير من اين تؤكل الكتف بل حتى الراس كيعرف ياكلو ليك. عيوش رجل الاشهار. هاد السيد كيقدموه بزافت الصحافة انه كيدعم ويدير ويدير ويدير وكيعرف وووو. السيد كيدعم راسو مصالحو. كيدعم البيزنس ديالو. كيخدم بيه المخزن الوقت اللي بغى وهو رهن الاشارة. عيوش حقاش رجل التواصل وكيسوق كلشي. دار ديكسيونير بالدارجة. هاد الخدمة سبقاتو فيها باحثة فرنسية وخدمو عليها لسانيين مغاربة. غير ما معروفينش ما كانش عندهم لا السلطة اللي عند عيوش لا الدهاء ديالو. عيوش مع اطلاق هاد الديكسيونير طلق حاجة اخرى. طبعا باش يدير البوز وكلشي يهدر عليه. كال باللي خاص عمر عزيمان ديال اللجنة الموكل اليها اصلاح التعليم بالمغرب تجري على جميع السياسيين. علاش هاد الشي حقاش كاين نقاش حول مجانية التعليم. كيف ديما الادلة ديال عيوش بليدة. كال راه الخادمة اللي عندو كيتقري ولادها بالفلوس. واو بصاح سكوب هادا. عيوش الهدف ديالو الاساسي ماشي هاد التعليم ولا غيرو. الهدف ديالو اظهار ان الملك هو اللي خدام والسياسيين كيعيقو التطور فالمغرب كيعيقو الاصلاحات الكبرى فالمغرب. خاصنا نتخلصو منهم. هاد الخطاب كلنا كندكروه. كالوه روجوه رجالات القصر وبغاو يجيو نموذج بنعلي ديال تونس. الديكتاتورية والتنمية. النتيجة راكم عارفينها. شخص اخر كينظم فطنجة منتدى وكاع اجهزة الدولة خدامة معاه لانجاح منتداه هو ابراهيم الفاسي الفهري. هادا سبة للتحول الديموقراطي فالبلاد. شفناه بدون وجه صفة فمراكش فالقمة الافريقية بلا حيا بلا حشمة حدا رئيس الحكومة ورئيسي مجلس النواب والمستشارين وكبار مستشاري الملك وبوه اللي هو مستشار ملكي٬ الطيب الفاسي الفهري كيضحك وكيتفلى اثناء القاء الملك لخطابه. هاد الايام والي الجهة والداخلية والخارجية ووو كلشي معاه وهو كينظم منتدى ديالو. الفضيحة انه حتى حزب الاصالة والمعاصرة اللي كان عندو واحد الوقت خطاب نقدي لمثل هاد الانشطة اللي كينظموها بحال هاد الشخص ولى كيدعمو. شفنا رئيس الجهة الياس العماري اللي هو الامين العام لحزب الاصالة والمعاصرة يشارك يحضر ويمنح الجوائز. وقع تحول فالموقف وتحول كبير. كاينة تصريحات كاين مواقف مازال مسجلة على قادة هاد الحزب اتجاه هاد الشخص. دابا التسويق لعيوش وللفاسي الفهري فظرفية الحكومة مازال ما تشكلاتش وهجوم عيوش المخطط له على حزب الاستقلال والقول انهم كيرسلو ولادهم يقراو اللغات وباغيين ولا الشعب يقراو العربية كلشي مرتب. بلا ما ننساو تحركات الملك فافريقيا. تبخيس عمل السياسيين خطر على المغرب. كلناها ف"كود" ونكرروها الف مرة. المسؤول عن الوضع لا السياسي لا الحكومي ماشي غير الاحزاب كلشي مسؤول. بلا ما تبقاو تغمقو على لمغاربة راهم عارفين كسكسونا باش مسكي. ظهور امثال عيوش والفاسي الفهري الابن بعد دستور 2011 سبة واحتقار للسياسة وللسياسيين. اهانة غادين نخلصو ثمنها كبير الى مشينا فهاد الطريق.
