واش ممكن يكون فيديو الزفزافي الفضيحة اللي تنشر البارح ف"برلمان. كوم" خارج غير من المجلس الوطني لحقوق الانسان. دابا هاد الفرضية قائمة. اللي كيدعمها ان المجلس سرب خلاصات تقرير حول معتقلي حراك الريف وقال باللي كان تعذيب. الجهة اللي لعبات دور ففيديو البارح كتقول بالصورة باللي "ما كاينش تعذيب" اي انه رد على تقرير المجلس. كيفاش ممكن يتصور؟ هادا يقدر يكون باش دار المجلس الخبرة الطبية. اييه الطبيب ما غاديش يصور ولكن اللي معاه ممكن يصورو فيديو يخليوه حجة على كلامهم. هاد الشي نفاه مصدر من المجلس ل"كود". قال باللي الطبيب ما شاف الزفزافي الا فالسجن وباللي مديرية السجون نفات فبيانها يكون تصور عندها واكدات ان الفوقية اللي كان لابس ما عمرو دخلها للحبس. اذن المجلس كيقول باللي ما يمكنش ليه يشوف المعتقلين الا فالسجن ولكن الطريقة باش كان كيتعامل الزفزافي مع هاد الفيديو تؤكد انه كان يتعامل مع طبيب ماشي مع سجان او مع محقق ولا ما كانش طبيب غادي يكون مع قاضي التحقيق او شي حد اللي يقدر يثيق فيه. واش ممكن يكون الفيديو فالمحكمة اثناء تقديمه ولا بعد اعتقاله او بعد تسلمه من قبل الفرقة الوطنية للشرطة القضائية؟ دابا كاين غير فرضيات. الوكيل العام كيدير تحقيقو. كلشي كيتسنى النتيجة. الثمن غادي يكون غالي ولكن الصراعات الداخلية تقدر تكون هي المحرك لهاد الشي
