وصل المنتخب المغربي البارح فالعشية لكالينيگراد على الحدود البولونية باش يلعب الماتش الثالث ديالو غدا مع الثمنية العشية فملعب هاد المدينة الزوين اللي كيهز 35 الف متفرج. لمغاربة ما غادينش يترينيو فهاد الملعب حقاش صبات الشتا. المنتخب نزل فاوطيل “ميركير” ديال مجموعة “اكور” وهو طبعا من الفنادق المعتمدة من قبل الفيفا. الجو تحسن شوية البارح فهاد المدينة والشتا نقصات. برنامج اليوم غادي يكون تداريب فالعشية فملعب اخر ثم ندوة صحافية مع المدرب مع الربعة العشية. غادي يكون تفراق التونيات هنا على الجمهور. جمهور قليل. البارح تلاقات “كود” واحد تفرج فسويسرا فين عايش ومشى مع صاحبو لبولونيا وغادي يكون غدا فالتيران. لخراين اللي تلاقاتهم “كود” جايين من كازا وفرنسا. ناس اوربا اكثر عددا من ناس المغرب لحد الان. الرايات قلال بزاف بزاف. تلاقات “كود” مع واحد فالعشية وسط المدينة حدا مول اوربا” هاز الراية وكيقلب على طاكسي. هادي مشكلة لكاع اللي جا يشوف الماتش. الطاكسيات ماشي بحال موسكو ولا سان بيترسبورگ٬ هنا خاص يعيطو عليهم ونهار الماتش كيغبرو وكيوجدو ترانسبور للجمهور من وسط المدينة حسب ما قال احد سكان هاد المدينة ل”كود”. اخر تلاقاو “كود” جاي من فرانسا حتى هو وكيقلب على “ماكلة حلال” وبعدو بانو 5 لمغاربة جايين من المانيا الروس هنا كيشجعو المنتخب وغادين يكونو فالتيران معاه ضد اسبانيا. هنا ما عندهمش بزاف مع المانيا ولا فرنسا ولا سويسرا. كيشجعو الفرق اللي كتلعب ضدهم. التاريخ كيحكم فالاختيار. تاريخ فيه الدم وفيه الحرب فهاد لبلاصة وغيرها من هاد المنطقة. الصلبيون كيف عاينت “كود” كانو قلال. قلال بزاف. شي عشرة اللي تلاقاتهم “كود”. تصورو كون كان امل للمغرب فالتأهل؟ كون هاد المدينة عامرة بالمغاربة. ولكن تقصينا قبل الوقت. طبعا كاينة رحلة دايراها “لارام” غادية توصل نهار الماتش غدا وكاين رحلات اخرى يقدر يجيو فيها لمغاربة اليوم وغدا
