واحد الكَروب ديال الموسيقى معروف فالمحمدية، اعتاقلوهم بتهمة الفساد، رغم أنهم وحسب مصادر موثوقة، كانوا غير ناشطين بآلات موسيقية فواحد الدار. ذات المصادر، قالت أن الفرقة تلقت اتصال من سيدة طلبات منهم يجيو يكَلسو مجموعين ويموسقوها شوية، والمشكل أن جيران هاد السيدة كان دارو بيها شكاية سابقا، وملي جاو الجوندارم لقاو الفرقة والسيدة كَالسين عادي وكيتموسقو عادي، ولكن مع ذلك تم اعتقالهم. بعد تقديمهم أمام نائب وكيل الملك، اللي استامع للموسيقيين، طلب استخراج أدلة إيلا كاين شي كاميرات فالمكان، باش يتأكد من كلام الموسيقيين، ولكن بعدما قامت عناصر الدرك باستخراج محتوى الكاميرات تم عرض القضية على نائب آخر، هادشي خلى القضية تاخد مسار غريب وتمشي فاتجاه الاعتقال والعرض على قاضي التحقيق. مصادر "كَود"، استغربت سبب هادشي اللي دارتو النيابة العامة، رغم أن الكَروب الموسيقي تشدو مع سيدة وحدة والخدامة ديالها، وهوما 9 ديال الرجال، يعني هاد تهمة الفساد ماكايناش، وفوق هادشي لقاوهم لابسين حوايجهوم وكَالسين عادي وماكاين حتى شي دليل على "الفساد". وختمت المصادر، أن الحاجة الوحيدة اللي كاينة فهاد القضية، وممكن تكون برزطات الجيران، هي الصداع والضجيج، وهادي تهمة لا تحتاج للمتابعة في حالة اعتقال.
