نداء حركة 20 فبراير بخريبكة للخروج يوم الأحد 11 شتنبر 2011 تحت شعار : حرية، كرامة، ديمقراطية، عدالة اجتماعية علاش غنخرجوا بمسيرة نهار الأحد 11 شتنبر 2011 مع الستة (18h00) ديال لعشية من ساحة المجاهدين بخريبكة أختي المواطنة، خويا المواطن، نخرجو جميع نساء ورجال، صغار وكبار في مسيرة نهار الأحد 11 شتنبر 2011 مع الستة ديالت لعشية من ساحة المجاهدين بخريبكة باش نقولوا ليتيحكمو في المغرب: * بلي لغلا فات لقياس ولعيشة ولات حارة، وخاصهم يوقفوا هاد الشي، ويعاقبوا ليكيخزنوا السلعة وليتسمسروا فيها، وما يبقاوش شي بعضاين محتكرين السلعة غير بوحدهم (الزيت، السكر، لحليب، الحوت، الخضر...)؛ * بلي خاصهم يزيدوا في ميزانية دعم المواد الأساسية، ويدخلوا مواد أخرى في الدعم (الزيت، القطنيات، اللحوم، مواد النظافة، الضو، الماء، الدواء...) وينقصوا من الضرائب على المواد، ويحيدو ضريبة الواد الحار من لخلاص ديال الما بخريبكة؛ * بغينا تعليم مزيان وفابور، وسبيطارات مزيانين وفابور وبلا رشوة وسير وجي؛ * بغينا السكنى تكون بتمن معقول ماشي لحماق ليكاين دابا؛ * بغينا حلول للبطالة ديال الشباب الليقارين والليمقارينش، ومخاصش الخدمة تبقى بالرشوة والوجهيات، وخاص يتعطى تعويض على الشوماج؛ * خاص مكتب الفوسفاط (لوسيبي) يتهلى في المنطقة و يخدم ولاد لانتريتية ديالو، وولاد الفلاحة ليخدا منهم لرض و ولاد المنطقة، ويبين لينا سميات ديول الناس ليخدموا في هاد الصيف وكيفاش؟؟ وخاص يتعاقبوا ليتيتلاعبوا في هاذ الشي يا لخوت؛ * بغينا عيشة بلا حكرة، بلا ظلم، بلا قمع، بلا رشوة، بلا وجهيات، وخاص يتحاكموا ليكيسرقوا فلوس الشعب و لي كيتعداو على المناضلين بالقمع والاعتقال ولخطيف والتعديب والقتل ولحباسات؛ * خاص يطلقوا لينا الشباب ليشادينهم في الحبس بخريبكة حيت دواو على حقهم، وكل المعتقلين السياسيين ومنهم شباب 20 فبراير؛ * بغينا دستور ديمقراطي ديال الشعب ماشي دستور مزور ليداروه بزز في شهر 7 اللي فات، ومبغيناش حتى حد يكون فوق القانون، واللي يحكم يتحاسب. وعنداكم ما تحضروش عاشت حركة 20 فبراير
