المواجهة بين الموقوفين و3 مسؤولين رجاويين سالات ببراءة النادي. تفاصيل حصرية عن موضوع مشى بعيد بزاف

بدأت النيابة العامة فالتحقيقات ديالها بخصوص الأحداث اللي عرفها فينال كاس العرش بين الرجاء الرياضي ونهضة بركان السبت الماضي، واللي متورطين فيها رجاويين، وحتى المكتب المديري د الرجاء راه كيتم الاستماع لشي أعضاء ديالو إلى جانب الرئيس محمد بودريقة.
وكشفت مصادر موقع "كود"، أن فرقة ولائية جات من الرباط لتيران الوزيس فكازا هذه العشية من اليوم الإثنين، بإذن من النيابة العامة، باش تحقق فالعلاقة ما بين متورطين فاعمال الشغب اللي وقعت فالماتش بتيران مولاي عبد الله بالرباط، وأعضاء بالمكتب المديري د الرجاء.
نفس المصادر، وضحت أن 144 شخص من مشجعين الرجاء الرياضي رهن الاعتقال بسبب تورطهم فاعمال شغب فينال كأس العرش، وخلال الاستنطاق ديالهم، قالو بلي كل من عبد الإله الإبراهيمي الناطق الرسمي د الرجاء والحاج مصطفى دحنان عضو المكتب المديري للنادي ورئيس اللجنة التنظيمية، هما اللي قالوا لهم سيرو للتيران د الرباط.
وكملت نفس المصادر ووضحت أن المسؤولين ديال الرجاء وملي نفاو هذه الشي للسلطات الأمنية د الرباط هذا الصباح خلال الاستماع إليهما، تقرر تجي فرقة ولائية من العاصمة الرباط إلى الدار البيضاء وبالضبط لتيران الرجاء الرياضي "ملعب الوازيس" فين كانوا كيتوزعو تذاكر الفينال على الرجاويين، باش الفرقة الولائية تدير مواجهة بين المعتقلين من الجماهير مع الإبراهيمي ودحنان المسؤولين بنادي الرجاء، وملي واجهوهم نفاو المتهمين وقالو بلي حتى واحد ما قاليهم سيرو لتيران الرباط.