بودريقة فك الجرة مع سيف الدين العلمي مول 600 مليون لرفع المنع من الانتدابات على الرجاء

نجح نادي الرجاء الرياضي برئاسة محمد بودريقة، أنه يلقى حل لملف النزاع مع اللاعب سيف الدين العلمي، وبالتالي رفع المنع من الانتدابات على النادي اللي غيقدر يكونفوكي اللاعبين الجداد خلال هذا الميركاتو الصيفي استعدادا الموسم الجاي، وهذا الشي من المنتظر يعلنو عليه الرجاء خلال الساعات القليلة المقبلة.
وكشفت مصادر جيدة الاطلاع لموقع "كود"، أن المكتب المديري ديال الرجاء الرياضي لقى حل باش يفكر الجرة مع اللاعب السابق للفرق سيف الدين العلمي، اللي كيتسال ما يقارب 600 مليون سنتيم، من حكم للفيفا لمصلحة اللاعب فنزاع ضد الرجاء، غيلصها الرئيس بودريقة، باش الفريق يترفع عليه المنع بشكل نهائي، ويقدر يسجل اللاعبين الجداد اللي تم التوقيع معهم خلال هذا الميركاتو الصيفي.
للإشارة فرئيس الرجاء الرياضي محمد بودريقة والمكتب المديري ديالو، لقاو ملي طلعو قبل شهرين بلاصة الرئيس السابق عزيز البدراوي، أن النادي غارق فنزاعات وأحكام على الفريق من الفيفا والجامعة الملكية المغربية لكرة القدم، لمصلحة لاعبين ومدربين سابقين بالنادي، كتوصل القيمة ديالها لحوالي مليار و 400 مليون سنتيم، ورا خلصوها وآخرها الحكم ديال صلاح الدين العلمي وقبل منو الليبي سند الورفلي اللي كان كيتسال حتى هو 285 مليون، بالإضافة إلى صرف فلوس مهمة للتوقيع مع مدرب جديد والطاقم التقني ديالو، ومع لاعبين جداد لتدعيم صفوف الرجاء، وتأدية مستحقات اللاعبين الحاليين واللاعبين اللي تفارق معهم النادي بشكل ودي باش ما يمشيوش للنزاعات وتفادي تكرار مشكل المنع من الانتدابات خلال المستقبل، وراه كتوصل قيمة المبلغ اللي صرف بودريقة والمكتب المديري ديالو فالرجاء ملي رجع للرئاسة مع نهاية ماي الماضي حتى لدابا حوالي 3 د مليار سنتيم.