الفرنسيات متفاجأت بمواجهة المغرب فثمن مونديال العيالات وخيفات.. بيدروس كيعرفهم وعندهم أحاسيس خاصة فالماتش ضد المغربيات

تفاجأت لاعبات المنتخب الفرنسي لكرة القدم، ملي عرفو أن المنتخب المغربي هو الخصم ديالهم فثمن نهائي كأس العالم للعيالات 2023، حيث كانو معولات يلعبو ضد ألمانيا أو كولومبيا، وماشي مواجهة اللبؤات بقيادة المدرب الفرنسي رينالد بيدروس، اللي كيعرف مزيان المنتخب الفرنسي، حيث فايت له درب عدد من اللاعبات ديالو، اللي سبق له دربهم فأولمبيك ليون الفرنسي وربح معهم ألقاب ما بين 2017 و 2019، كذلك هذا الماتش بين المغرب وفرنسا فيه طعم خاص حيث اللاعبات المغربيات والفرنسيات كيعرفو بعضهم بحكم أن بزاف منهم كيلعبو مع الفرق ديال البطولة الفرنسية.
وكشفت لاعبة المنتخب الفرنسي أوجيني لو سومر فلقاء إعلامي مع الصحافة الفرنسية البارح الجمعة بمدينة أديلايد الأسترالية، اللي وصلت لها اللاعبات الفرنسيات باش يلعبو مع المغربيات، وقالت: "تأهل المنتخب المغربي إلى ربع نهائي مونديال العيالات مفاجأة، ولو أن كلشي ممكن فكرة القدم، ولكن نسبة التأهل ديال المغربيات كانت قليلة، وكيبقى هذا الشي زوين حيث واخا تكون الفرص قليلة للتأهل فممكن يتحقق، كنا أول مفاجأت فالمونديال وكنا كنفكرو في مع من غنلعبو واش ألمانيا أو كولومبيا، ولكن المغرب قرر يكون العكس ديال هذا الشي".
وأكدت اللاعبة الفرنسية المخضرمة أن المنتخب الفرنسي خاصو يحافظ على التواضع ديالو أمام المغرب، والحذر ولو أن هذا ما كافيش أمام المغربيات، وقالت: "سنكون حذرات، ما كنظنظش أن ألمانيا ما كانتش لاعبة بجدية فليماتش ديالها، ولكن المنتخبات اليوم ولات كتقدم 100% حتى 200% من داكشي اللي عندها، وكتنجح فتحقيق نتائج غير متوقعة، وهذا هو جمال كرة القدم، حنا محافظين على سلوكنا وما حاكرين حتى حد، وما ننساوش أن جاميكا اللي تعادلنا معها فنتيجة غير متوقعة راه هي اللي قصات البرازيل".
وكتشدد أوجيني لو سومر، ووضحت كثر: "ما بقاتش شي منتخبات صغيرة حيث كلشي ممكن دابا، وخاصنا نكونو منتبهات حنا عارفين شنو باغين من هاد الماتش وخاصنا نساليوه بالطريقة الصحيحة، صحيح أن المنتخب الفرنسي مرشح على الورق أمام المنتخب المغربي وفافوري، ولكن ف كرة القدم هذا الشي ما كيعني والو، ملي وصلنا هنا كانت عندنا نفس الطموحات وما تبدلاتش حيث غنلعبو مع المنتخب المغربي، ونفس الحاجة كانت غتكون لو كنا غنلعبو مع منتخب آخر، وراه باغيين نربحو وهذا هدفنا".
وبالنسبة لأفضلية الفرنسيات على المغربيات من حيث التجربة، قالت اللاعبة الفرنسية: "وي عندنا خبرة كثر من لاعبات المنتخب المغربي فالبطولات الكبرى، حيث هادي هي أول كأس عالم عندهم وأول مرة يوصلو إلى ثمن النهائي، ودابا هذا الشي بين يدينا خاصنا نستغلو التجربة والخبرة اللي عندنا، ونديرو وصفة الفوز بالماتش والتأهل.. اه كاين فرق كبير ما بين المنتخب الفرنسي والمغربي على الورق، ولكن ملي كنشوفو شكون قصاو وفين هما دابا، فهذا الشي كيعني أن المغربيات عندهم إمكانيات وخاصنا نردو البال معهم".
اللاعبة الفرنسية أوجيني لو سومر، اللي سبق لها لعبت تحت قيادة الناخب الوطني رينالد بيدروس، ملي كان مدرب لاولمبيك ليون الفرنسي للسيدات، وربح معه عدد من الألقاب بينها دوري أبطال أوروبا، تحدثت كذلك خصوصية المواجهة بين المدرب الفرنسي اللي كيدرب المنتخب المغربي وبينها هي كلاعبة عندها معه ذكريات زوينة، وقالت: "كرة القدم رائعة، كن قاليا شي حد ملي مشى بيدروس من ليون عام 2019، أننا غنطلقاو معه فربع نهائي كاس العالم 2023، ما كنتش غنتيق، ومن الفوق فمواجهة مع المغرب.. مزيان اللقاء مع مدرب سابق، بيدروس شخص كيحب الحياة والتعايش وكيعطي ردود فعل إيجابية للفريق ديالو، وحقق معنا حوايج زوينين وربحنا معه دوري أبطال أوروبا، والبطولة الفرنسية جوج مرات وكأس فرنسا، حتى هو، كان قادر يتكيف مع اللاعبات ديالو ويتطور فبزاف د الأنظمة، وكيعرف المنتخب الفرنسي مزيان، سوا اللاعبات د ليون اللي كانوا عندو أو لاعبات أخريات، والمواجهة معه غتكون عندها لحظات خاصة وهذا الشي أكيد".
وعن مواجهة اللاعبات الفرنسيات للاعبات المغربيات اللي كيلعبو معهم فالبطولة الفرنسية قالت أوجيني لو سمر: "تواجهت مع بزاف من اللاعبات المغربيات فالبطولة الفرنسية، ولعبت مع سلمى أماني ففرق الشبات فبريتاني، هذا الشي قديم ولكن تعارفنا لمدة طويلة بزاف، وكنظن هذا الشي ملي كانت عندنا 12 أو 13 عام، ولعبنا بعدها فكليرفونتين، داز وقت طويل باش تلاقينا آخر مرة، ولكن حنا متبعين بعضياتنا من بعيد، وما كنتش كنفكر بلي غنتلقاها فكأس العالم، واو على قدر.. حنا هنا فالطرف الاخر من العالم غنلعبو أو غنتواجهو مع بنات سبق ولعبنا معهم أو لعبنا ضدهم، وهذا الشي رمزي وزوين وفيه لحظات خاصة للبلدين فرنسا والمغرب".