البارصا باغيا أوناحي مول 8 وإنريكي مدرب إسبانيا السابق داخل فالصفقة

صبح الدولي المغربي عز الدين أوناحي نجم المنتخب الوطني المغربي وفريق أنجي الفرنسي مطلوب فالبارصا الإسباني، من بعد المستوى الكبير اللي قدمو مع المنتخب الوطني المغربي فكأس العالم 2022.
وكشف جريدة "موندو ديبورتيفو" الإسبانية والمقربة بزاف من البارصا، أن الأخيرة باغيا تتعاقد مع عز الدين أوناحي اللي عندو 22 عام، وخصصت الجريدة الغلاف ديالها لعدد اليوم الاثنين لصورة نجم وسط تيران المنتخب الوطني المغربي ودارت عنوان كبير عريض قالت فيه: "أوناحي هدف البارصا".
وتحدثت الجريدة الإسبانية على الإمكانيات ديال عز الدين أوناحي واللي تألق بشكل لافت فمونديال 2022، وأكدت بلي لويس إنريكي الناخب الإسباني اللي واجه المنتخب الوطني المغربي الأربعاء الماضي فثمن نهائي المونديال وخسر معه بالبيلانتيات، هو اللي بروبوزا اللعاب على البارصا، وقالهم بلي أوناحي يصلح للفرقة، وأنه خيار مزيان بزاف وحتى القيمة المالية اللي يقدر يخلصها الفريق الإسباني باش يجيب اللعاب ويحصل على الخدمات ديالو منخفضة.
لويس إنريكي المدرب السابق للبارصا واللي انفصل عن المنتخب الإسباني الخميس اللي فات بسبب الإقصاء من ثمن نهائي كأس العالم أمام المغرب، كان عبر على الإعجاب ديالو بعز الدين أوناحي وبالأداء اللي قدم مع المنتخب الوطني المغربي ضد إسبانيا، وقال فالندوة الصحافية من بعد الماتش: "عجبني اللعاب رقم 8 لعب بطريقة واعرة ما عقلتش على الاسم ديالو وفاجأني بزاف، وطبعا أشرف حكيمي ويوسف النصيري وسفيان أمرابط، كيلعبو زوين بزاف".
وبقى لويس إنريكي كيركز على عز الدين أوناحي فالحديث ديالو وكيحاول يتفكر الاسم ديالو ووصفو بالرقم اللي لابس فالتوني ديال المنتخب المغربي وقال وأكد: "هداك مول الرقم 8 (عز الدين أوناحي) ما وقفش من الجري فالماتش، وغادي يكون عيا راه دويت مع الطاقم التقني ديالي على هادشي".