الجندارم ديال الدروة طيحو بزناز وها شنو حجزو عندو (صورة)

عاش دوار ضواحي الدروة، البارح بالليل، فليم ميريكاني ديال الأكشن، قبل ما تمكن عناصر الدرك الملكي بمركز الدروة، وبإشراف من قائد سرية درك برشيد، من توقيف بارون مخدرات كان شريك الجبلي المدعو "العمراني"، وحجزات عندو حوالي 180 كيلو ديال المخدرات فيها 100 كيلو حشيش و80 كيلو كيف و10 كيلو طابا .
وفي هذا السياق، قالت مصادر "كود"، إن تفاصيل توقيف هذا البارون كترجع مللي توصلت مصالح الدرك بمعلومات تفيد أن تاجر المخدرات المدعو "العمراني" فتح دارو لتجارة السموم نواحي الدروة، الأمر لي خلا عناصر الدرك ترسم خطة أمنية محكمة باش داهم المنزل ديالو للي رجع مستودع ديال المخدرات، وتوزعت عناصر الجدارمية على مجموعتين الأولى بسيارات مدنية والمجموعة الثانية بسيارات ديال المصلحة اوقصدو دار البزناز للي كيبيع فيها السموم ديالو، والخطة ناجحة بعدما تم مداهمة المنزل وحجزو عندو 100 كيلو ديال الحشيش و70 كيلو كيف و10 كيلو طابا .
مصدر "كود" تيضيف أن أفراد الدرك بعدما حجزو هذا الكمية الكبيرة ديال المخدرات او شدو البزناز تم اقتيادو صوب مركز الدرك رفقة المحجوزات، بحيت تم وضعو تحت تدابير الحراسة النظرية بتعليمات من النيابة العامة.