المقدم والقايد كيف ماهوما ديما الحل وفي الخطوط الامامية لمواجهة أي كارثة كتحل على المغرب كيف ماهوما جزء كبير من الموشكيلة وكيزيدو يعرقلوا الأمور ويرونوها ويردو منها موشكيل عابر للأجيال والزمن

، ماكان لأي كاريان او حومة عشوائية يتبناو في المغرب بلا مساعدة مباشرة من المقدم والقايد، بلا منهضرو على المناطق لي فيها الكيف او الحدودية بحال كاستييخو وبليونش فين شهادة السكنى واصلة مليون وكثر على الأقل لانها كتخولك تدخل لسبتة، انا كبرت في الاحياء الاعشوائية وبعت وشريت في الأسواق فين كان القايد هو خليفة الله على أرضه، الحاكم الناهي ومكانش يمكن تخرق القانون بلا ماتعطيه الپاي ديالو.
في المقابل راه في الحزة والمصائب والكوارث كتلقى عاوتاني غير القايد والمقدم هوما الحل الأمثل لتقديم أي مساعدة او إحصاء او تواصل مع الساكنة، في غياب تام للمنتخبين لي مكيعرفهم تاحد لاش صالحين ، المقدم والقايد هوما لي كانوا واقفين ليل نهار في كورونا ويدورو زنقة زنقة درب درب دار دار، وطبعا شي قياد زادو من عندهم وناضو يصرفقو في الناس ويتسلطو عليهم وعجباتهم تضخم السلطة لي وللى عندهم، وطبعا كي العادة ناض التخوفيش في توزيع المساعدات كيف العادة ديما ديال أي حاجة يدخل فيها المقدم والقايد.
حاليا غادي يتفرقوا فلوس كثيرة في الحوز وعادي أننا نشوفو الدوار لي كانت فيه عشرين دار ولات فيه تلاتين، ونشوفوا ناس رجعوا من المدينة وحاطين خيمة جنب الدوار باش يستافدو، وهادي راه همزة حقيقية للمقدمية والقياد ورجال السلطة، راه في عز توزيع المساعدات شدو مقدم كيتخلص فيهم ب خمسمية تريال للقفة، هادي غير القفة وناض فيها البيع والشرى مابقى غير تعويض بالملايين، راه نقدرو نشوفوا تضخم دواويري في المنطقة لي تقدر تعوض الساكنة لي ماتت الاه يرحمها ويضوبلوها جوج مرات وتلاتة، وطبعا هادشي مايمكنش يدار بلا مقدم والقايد.