الديمقراطية في المغرب دايرة بحال الصالون زوين ومقاد وديما مخمل ومقيوم غالي ولكن مديور غير باش يشوفوه الضياف أما بالنسبة لمالين الدار فراه يمكن يكونوا حسن بلا بيه

الديمقراطية في المغرب دايرة بحال الصالون ديال أي دار مغربية، ديما مقاد ومخسور عليه الفلوس كلها على قد جيبو ولكن في الغالب كيكون هو أغلى بلاصة في الدار، وطبعا غير قابل للإستعمال إلا من طرف الضياف لي نادرا مكيجيو، ولكن خاص نهار يجيو يلقاو الصالون مقاد وتحطو ليهم السينية والبراد والطباسل ديال الضياف، نهار تبغي تستعمل هاد الصالون كتلقاه ماصالح لوالو وغير عملي نهائيا، التلفازة معلقة فاللخر ديالو بحال شي طابلو كثر من أنها مديورة للمشاهدة، الطابلة في نفس ارتفاع السدادر لي كيخلي الماكلة فيه تكون بحال شي حصة ديال التعذيب خصوصا للناس لي كياكلو في طبسيل واحد فدوك الطابلات الدايرين، أكثر بلاصة مخسور عليها الفلوس في الدار نهار كتستعملها كتلقاها ماصالحة لوالو من غير التباهي قدام البراني.
هاكاك دايرة ديمقراطية في المغرب، كتقام غالية على الشعب والبلاد، ونهار كنوقفو عليها باش نستعملوها كنلقاوها ماصالحة لوالو، صالحة فقط باش يقول علينا البراني راه عندنا ديمقراطية وراه الشعب هو لي كيحدد المصير ديالو بواسطة المنتخبين، ونهار جات كورونا لقينا أن الاحزاب السياسية وجمعيات المجتمع المدني والمنتخبين والبرلمان والجماعات ماصالحين لوالو من غير تشتات الفلوس على حملات تعقيم ديال الحجر والشجر ملا نتيجة ومعندها حتى شي فايدة، ولقينا أن المقدم والقايد والوالي وباقي رجال السلطة هوما لي مشاو بالبلاد حتى قريب يوصلوها لبر الأمان، ولقينا أن الوزراء لي مصوت عليهم تاواحد هوما لي دايرين خدمتهم، أما لي صوتو عليهم الناس في دائراتهم هادوك أغلبيتهم كان زايد ناقص.
بالقاسم الإنتخابي أو بلاش كتبقى الديمقراطية في المغرب غير بحال الصالون ديال الدار مقيوم غالي و مديور باش يشوفوه الضياف وماصالح لوالو في الإستعمال اليومي، حتى الى تحيد من الدار ماغادي تفتقد والو بل العكس تقدر تربح مساحة وميزانية فين تدير فيها شي حاجة مفيدة، أغلب المغاربة كيشوفو في البرلمان وميزانيتو كتبذير للمال العام، مادام أن اغلب القرارات لي كتهم المغاربة بصفة مباشرة ولي عندها أثر على معيشهم اليومي مكيجيوش من البرلمان، غير كيدوزو منو يتصادق عليهم وصافي، ونهار البرلمان كيعمر وتنوض فيه هيلالة فعمرها ماغادي تكون لصالح المواطن بل غير للمصالح الشخصية والحزبية وهادشي لي شفناه نهار التصويت على القاسم الإنتخابي الجديد، لذا بما أن الديمقراطية كتقام علينا غالية ويمكن نعيشو مزيان بلا بيها ولكن راه مهمة للضياف يشوفوها ملي يجيو عندنا فعلى الأقل ماتقامش علينا غالية تكايسو شوية.