كواليس لقاء الأغلبية..البام والاستقلال متمسكين بتقسيم صندوق العالم القروي وبرلمانيين بغاو تعديل حكومي وحمدي ولد الرشيد كعا وتفرعن وبنعلي: مكنتشاورش مع أخنوش باش نجاوب على المحروقات – فيديوهات

البارح الاثنين 13 نونبر 2023، فلقاء الأغلبية الحكومة لي حضرو فيه زعماء أحزاب التحالف الثلاثي: التجمع الوطني للاحرار، والأصالة والمعاصرة والاستقلال، كشف مجددا بلي هاد الاغلبية فيها خلافات رغم نفي زعماء هاد الاحزاب فالتصريحات الصحفية لهاد الخلافات.
"كود" سولت عدد من البرلمانيين منهم رؤساء فرق الأغلبية بخصوص الجدل القائم حول صندوق تنمية العالم القروي، منهم للي أكدوا على أنه خاص فعلا نقاش حول هاد الصندوق لي فيه 55 مليار درهم.
فكواليس الاجتماع، عدد من البرلمانيين تهربو من الجواب على اسئلة "كود" ومنهم لي تفرعن بواحد طريقة "مستبدة" وغريبة يمكن مولفينها مع الاتباع ديالهم، كما وقع مع حمد ولد الرشيد بحيث بمجرد ما مدينا ليه ميكرو وهو يكعا واش نتوما عاد دخلت جايين تسولني على الاغلبية ولا شناهيا.
رئيس فريق البام فالبرلمان ل"كود": هاد الصندوق كان تابع لوزارة الاسكان قبل 2008..وأنا ماشي مفسد
فالبدية فاش هضرنا مع رئيس فريق الأصالة والمعاصرة، أحمد التويزي، كعا حيثاش قاليك كنكتبو عليه بلي متابع فقضايا الفساد، وقال ل"كود" :"انا ماشي مفسد"، وجاوبناه بلي عمرنا ف"كود" كتبنا عليه مفسد كتبنا فقط متابع فمحكة جرائم الأموال بمراكش.
وموراها أجاب التويزي على الجدل حول صندوق تنمية العالم القروي وصرح بلي "النقاش حر وسط الأغلبية ولكن فاش تقول لينا الحكومة مبغيتش هادشي صافي طوينا الموضوع".
وأضاف تويزي ل"كود" أن الأغلبية متجانسة ومتوافقة على البرنامج الحكومي، موضحا :"فعلا البرلمانيين ناقشوا الموضوع، وكان الصندوق كتسيرو مديرية قبل 2008 من طرف مديرية بوزارة الاسكان".
وتابع التويزي :"طرحنا الموضوع ولكن ماشي وقتو..والنقاش داخل الأغلبية حر".
رئيس الفريق الاستقلالي كاعي: صندوق العالم القروي فيه نقاش ماشي خلاف
من جانبه أكد نور الدين مضيان، رئيس الفريق الاستقلالي للوحدة والتعادلية، أن ما أثير حول صندوق تنمية العالم القروي هو نقاش وليس خلاف.
وأضاف مضيان :"دبا تسحب تعديل حول صندوق تنمية العالم القروي"، مشددا بأن الأغلبية منسجمة.
وبخصوص حاجة الأغلبية إلى تعديل حكومي، قال رئيس الفريق الاستقلالي :"التعديل عندو ماليه".
البرلمانية ياسمين لمغور: الأغلبية منسجمة ومكاينش نقاش على صندوق العالم القروي
في المقابل، تقول ياسمين لمغور، البرلمانية عن فريق التجمع الوطني للأحرار :"لا وجود لنقاش حول صندوق تنمية العالم القروي ومكاينش فشي تعديل هاد القضية".
وأضافت لمغور ل"كود" :"الأغلبية منسجمة ومتماسكة داخل البرلمان أما كلام الكولورات والكواليس لن يزعزع الحكومة".
وبخصوص جدل المحروقات قالت لمغور :"كاين لي بغا يسيس الموضوع ومفهموش الدرس وكان جواب المغاربة واضح ف8 شتنبر"، مضيفة :"هاد الملف مبقاش واكل انتخابيا وهوما تلقاو درس فالانتخابات".
وزادت هاجمت البي جي دي بالقول :"يلا بقاو كيسيسو الملفات موحال يبقاو مجموعة نيابية فالاستحقاقات المقبلة ويقدرو يوليو نواب غير منتسبين".
وزيرة الانتقال الطاقي: مكنتشاورش مع رئيس الحكومة باش نجاوب البرلمانيين على المحروقات
ليلى بنعلي وزيرة الانتقال الطاقي والتنمية المستدامة، تعجبات كيفاش تروج عليها بلي مكتبغيش تجاوب على مواضيع كتعلق بالمحروقات.
بنعلي قالت ل"كود" :"ابدا مكاينش هاد الهضرة وانا كنجاوب على المحروقات"، ردا على ما روجته مجموعة البي جي دي لي كشفت بلي بنعلي قالت لشي نواب فالكواليس بلي مكتقدرش تجاوب على المحروقات حتى تشاور مع رئيس الحكومة لأنه كيجبذ ليها الصداع.
برلماني استقلالي: ضروري يكون تعديل حيثاش حصيلة بعض الوزراء لا ترتقي بالعمل الحكومي
محمد الحافظ، البرلماني الاستقلالي، تهرب من نقاش صندوق العالم القروي، ولكن أكد بلي الحكومة محتاجة لتغيير حيثاش حصيلة بعض الوزراء لا ترتقي بالعمل الحكومي.
وأكد الحافظ ل"كود" في جميع المحطات خاص تعديل حكومي لأن بعض القطاعات تعاني في صمت وضروي من تحريكها.
جمال الديواني ولغة الخشب: بلا متصورو
جمال الديواني، رئيس لجنة القطاعات الانتاجية، عن الفريق الاستقلالي، مخلوع ومبغاش يجاوب على الجدل على صندوق تنمية العالم القروي.
الديواني، قال بلي داكشي رئيس الفريق الاستقلالي هو لي غايهضر. وزاد بلا متصورو.
الفيديوهات:
https://www.youtube.com/watch?v=qdwcJObG9Kg
https://www.youtube.com/watch?v=Qa3OCa41yik
https://www.youtube.com/watch?v=_aK-kof0S0A
https://www.youtube.com/watch?v=0AJ0tOK67ys
https://www.youtube.com/watch?v=QU4o6QfOJdc
https://www.youtube.com/watch?v=_XWVmezS2Wc