لطيفة رأفت: عرفت "إسكوبار الصحراء" 15 اليوم وتزوجها 130 يوم وطلقنا حيت مقدرتش على السهرات وكان غامض بزاف

خرجات الفنانة المغربية لطيفة رأفت البارح الاثنين فلايف على صفحتها ودوات على طليقها أحمد بن إبراهيم المعروف بإسكوبار الصحراء لي مشدود في المغرب فقضية الاتجار الدولي في المخدرات، لي تشد سنة 2019، ولي جر معاه أسماء كبيرة بحال سعيد الناصري رئيس الوداد الرياضي وعبد النبي البيوي رئيس جهة الشرق وعدد من المتهمين
قالت لطيفة أنها تعرفات على البارون لي عندو الجنسية المغربية لمدة 15 يوم، وقدم ليها راسها كرجل أعمال دخل يستثمر في المغرب وكان عندو الشركات والفلوس، وعمرها عرفات أنها عندو علاقة بالحشيش. وقالت لطيفة لي كانت معصبة ومعاجبها حال :"مغاديش نتزوج واحد نخدم عليه. تزوجو على سنة الله ورسوله، وهاد البلبلة لي نايضة على هاد بارون المخدرات ميمكنش يثق فوحدة عرفها 4 شهر ويقل ليها شكون هوا".
ووضحات لطيفة أن مدة الزواج مفاتتش 4 شهر و10 أيام، وقالت بحالا شديت عليه حق الله، وتفارقو برغبة منها هي حيت معجبهاش كيفاش كان عايش فمدينة الدار البيضاء وكان مبلي بالسهرات والحفلات والنشاط. وكشفات رأفت انها شرطات عليه يمشيو يعيشو فالرباط فدارها وسكنو مدة قصيرة، لكن السيد كان غامض وهي مبغاتش تبقى هاكة ودارو طلاق الشقاق، حتى العدول هي لي خلصاتو، وقالت "لو كنت عرفتو بارون كون طمعت فيه يكتب ليا كلشي الأملاك ديالو والى تشد يبقاو ليا..
لكن انا شفت منو غير الخير، ولكن عمرني عرفت شنو كيدير". أكدات لطيفة أنها إلا خرجات اليوم تدوي هو باش الناس يعطيوها تيساع ويخليوها هي وبنتها يعيشو بسلام. "جا الوقت باش نهضر، لأنني مكنفكرش فنفسي، كنفكر فسمعتي باش منعملش شي حاجة لي تضرهم، واليوم كنفكر فبنتي ألماس.. من نهار تزادت ونتوما كتهضرو، بنتي زعرة حيت باها زعر، وكون ولدتها مع المالي كون هي سمرة". وكيتعتابر هادا أول خروج للطيفة فهاد الموضوع لي منوض حالة فالبلاد.