احتج محمد مديحي المدرب المساعد فالوداد الرياضي على الطريقة باش كيدويو بها الحكام مع اللاعبين، وهذا الشي بعدما سالت ماتش الواك والمغرب الفاسي الخميس 11 يناير 2024، ضمن الدورة 12 من منافسات البطولة الإحترافية لكرة القدم، واكد ان المدرب فوزي البنزرتي ما كيستحقش الطرد من الماتش. وتحدث محمد مديحي خلال الندوة الصحافية اللي كانت بعد تعادل الوداد والماص بواحد لواحد، وقال: "دخلت الندوة على اساس باش ما ندويش فالتحكيم، كلشي الناس تفرجو وكاينين ناس الاختصاص هما اللي غيقدرو يتكلمو على هذا الشي وما بغيتش ندخل فهاد ليديطاي، كنتمنى من الحكم كيفما كنحتارموهم يبقاو يحتارمو ويدويو مع اللاعبين باحترام راه بار فوا كيقولو لينا شي... الله يهديهم". وبخصوص حالة طرد المدرب فوزي البنزرتي، كشف مديحي: "الحكمة ديال التوش هي اللي ديسيدات ان المدرب فوزي البنزرتي ياخد كارط جون، وكنتفاجؤ ان الحكم الرابع هو اللي كيقرر، وهو اللي قاله ما كافياش بهاد المصطلح، راه عندهم ليكيت يرجعو لهم وان الصفرا ما كافياش، كنعرفو فوزي البنزرتي وطريقة التعبير ديالو والتفاعل فالماتش يشد حوايجو ويهزهم واي واحد يقدر يدير هذا الشي ويطلعو له حوايجو، كنظن ان كارطون جون گاع كافية". وختم محمد مديحي: نخليو بصراحة ناس الاختصاص هما اللي يدويو على هذا الشي ديال التحكيم، واليوم نباركو للاعبين والجمهور اللي حضر بزاف وشجعنا، والماتش كان فيه الريتم ومن احسن المباريات ملي جا البنزرتي، ودرنا ماتش مزيان واخا بزاف ديال الإكراهات، وكنقول للجماهير راهم هما السند ديال هاد اللاعبين وإذا كانوا بحال اليوم كيساندونا راه ما غنخليوش من جهدنا".