صافي را دويت معاه. غادي تاخد ماتش": كلام مسؤول رجاوي كبير على عقوبة متولي اللي جاية منوض قربالة

فيديو فيه رضوان الطنطاوي الكاتب الاداري لنادي الرجاء البيضاوي بعد نهاية ماتش الديربي ديال لخميس اللي فات بين الوداد البيضاوي والرجاء البيضاوي كيهدر فيه على طرد العميد محسن متولي كيقول فيه "صافي را دويت معاه دويت معاه" ثم لقطة فيها نفس المسؤول كيقول لمتولي "وا معاك غادي تاخد غا ماتش واحد".
فاللول باش كيقول دويت معاه كيهدر على لاربيط رضوان جيد اللي طرد اللعاب. فالثاني كيقول لمتولي باللي بعد ما هدر مع لاربيط راه غادي ياخد غير ماتش واحد. يعني ان لعاب الرجا غادي يغيب الماتش الجاي ضد شباب المحمدية ومن بعد يرجع يلعب 4 الماتشات اللي باقية فالبطولة.
طبعا هاد الشي تزاد عليه "جهات عليا" اللي هدر عليها الوينرز وقال باللي الكورة متحكم فيها وان جهات عليا كتخيط وتفصل وترتب كلشي٬ راه نايضة وصافي.
دابا المسؤول الرجاوي بان هو اللي كيقرر فلجنتي التأديب والاخلاقيات التابعة للجامعة. هو اللي كيحدد العقوبة اللي كتكون بناء على تقرير حكم الماتش رضوان جيد.
دابا مشاكل كثيرة طيح فيها بيضاوة هاد لاربيط. خمسة الماتشات باش يتحدد البطل غادية دوز على كازا بحال شي قرن وكلشي على اعصابو وتبعات هاد الاجواء ممكن تكون خطيرة. كلشي يعرف جمهور الحمرا والخضرا كيف دايرين