واخا ربح الرجاء الرياضي الماتش ديالو البارح ضد اتحاد طنجة ضمن الجولة 11 من منافسات البطولة الاحترافية لكرة القدم، ما كانش هادشي مقنع بالنسبة لجماهير الخضرا باش تنعس على جنب الراحة وتقول أن فريقها بخير وعلى خير، وعادي يقدر يربح على الأقل لقب من الألقاب اللي منافس عليها هذا الموسم. جماهير الرجاء الرياضي تفاعلت مع انتصار فريقها على اتحاد طنجة بشكل محدود بزاف واخا كانت النتيجة 3 لزيرو، وأكدت على مواقع التواصل الاجتماعي أن الفوز على اتحاد طنجة ماشي معيار حقيقي نهائيا حيث طنجاوة فريقهم ضعيف بزاف والدليل المركز الأخير فالبطولة اللي كيحتلوه برصيد 2 النقاط من 11 ماتش لعبوه وخسرو 9 المرات. ودعت جماهير الرجاء الرياضي إدارة النادي برئاسة عزيز البدراوي والمساندين له اللي بداو كيقلالو، لعدم الركوب على هذا الانتصار، واللي جا أولا بالضغط اللي داروه المشجعين ديال الخضرا على الخصم فالتيران، والاجتهاد ديال شي عناصر فالفريق فحال المهاجم حمزة خابا اللي كان البارح فاليوم ديالو وقدر يماركي 2 بيوتا، إضافة للمدرب منذر لكبير اللي غير كيرقع حيث ما عندوش فيكتيف قوي نظرا للتركيبة البشرية المحدودة ديال الخضرا هذا العام، من بعدما شرف عزيز البدراوي على إفراغ الفريق من اللاعبين المزيانين ووصفهم بالكرارس الصيف الماضي، وجاب لاعبين ما شي فمستوى الرجاء العالمي، واللي غيقدرو ينافسو على الألقاب وهادشي تأكد مع مرور ليماتش. جماهير الرجاء الرياضي حذرت عزيز البدراوي من تغليط الرجاويين مرة أخرى، ورفعت شعار "لا للسريح" فوجهو، وأكدت من بعد الرباح على اتحاد طنجة، أنها مازال عند كلمتها اما يحل رئيس النادي مشاكل النزاعات ويجيب لاعبين مزيانين فهاد الميركاتو الشتوي وإما يحط السوارت ويزيد بحالو، حيث الرجاء ماشي ديال التجارب والتجربة ديالو إلى حدود الآن فاشلة وعندو فرصة أخيرة باش ينقذ هاد التجربة خلال هذا الشهر، وشددت على أن الخضرا ما واقفاش عليه وخاصها رئيس اللي يكون قد كلامو قدر جيبو ماشي كلامو كثر من مالو.
