الوداديين واقعيين قبل الروتور ضد صن داونز.. عارفين أن التأهل لفينال العصبة صعيب والإقصاء وارد بزاف

يحل الوداد الرياضي ضيفا على ماميلودي صن داونز الجنوب إفريقي السبت المقبل بجنوب إفريقيا، وذلك برسم إياب ربع نهائي عصبة أبطال إفريقيا، وهي رحلة كلها خطورة حيث أن الفريق يقد يخسر اللقب اللي ربح العام اللي فات ويودع المسابقة من الدومي فينال.
بعثة الوداد الرياضي غتشد الطريق غدا الثلاثاء إلى جنوب إفريقيا حيث المدرب زفين فاندنبروك أكد على إدارة النادي ضرورة السفر قبل موعد الماتش بمدة 3 أيام، حتى يقدر الفريق على التأقلم مع الأجواء ويوجد للماتش في ظروف جيدة، خصوصا على المستوى البدني وهذا هو الجانب اللي مخوف الوداديين بزاف، حيث لاعبين الواك ما كانوش فالفورما نهار ماتش الذهاب باستاد دونور قدام لاعبين صن داونز اللي كانت عندهم لافريشور وكيربحو "دوزييم بال" وحتى "ليدوييل".
الوداد غيمشيو عبر رحلة جوية خاصة بعد مجهودات كبيرة دارتها إدارة الوداد ورئيس النادي للحصول على ترخيص بدخول طائرة تابعة للخطوط الملكية المغربية إلى الأجواء ديال جنوب إفريقيا، حيث الأخيرة كتمنع استقبال طائرات لارام، والطائرة المغربية المقلة لبعثة الواك غتقلع غدا الثلاثاء من مطار محمد الخامس بالدار البيضاء إلى جوهانسبرغ، وغتوقف بليبروفيل الكابونية لأسباب تقنية وتكمل طريقها.
الأجواء داخل الوداد الرياضي عادية بزاف وكيطبع عليها التحفظ وكلشي عارف أن نتيجة التعادل مع صن داونز في الذهاب بزيرو لزيرو بكازا، كتخلي جميع الاحتمالات واردة خلال الإياب، بالإضافة إلى الظروف اللي كيمر منها الفريق تقنيا وذهنيا وغياب الاستقرار في ظل التغيير المتكرر للمدربين حتى وصل عدد الأطر اللي دربت الواك هذا الموسم إلى 4 بالمدرب الحالي زفين فاندنبروك، مع عدم وجود تشكيلة قارة.
الإصابات حتى هي عندها نصيبها من قلق مكونات الوداد، وآخرها الضربة اللي تعرض لها هداف الفريق صامبو جونيور خلال ماتش الذهاب ضد صن داونز، وصعيب يكون اللاعب حاضر خلال الإياب بالرغم من المجهودات اللي كيقوم بها الطاقم التقني للواك باش يوجدوه، لكن نسبة حضورو اللقاء كتبقي قليلة بزاف، وبالمقابل كاينة حظوظ كبيرة باش يلعب جلال الدولي الروتور ولو أن الأفضلية عند رضا الجعدي اللي قدم مباراة واعرة فالألي.
المحيط ديال الوداد فيه توتر كبير كذلك، والحديث هنا حول غضب جماهير الفريق على مجموعة اللاعبين وكيشوفو أن مستواهم تراجع بحال أيمن الحسوني ويحيى جبران ويحيى عطية الله هذا الأخير اللي كان مفاجأة مونديال قطر 2022 مع المنتخب المغربي، وكاين من أنصار الفريق اللي كيشوف أن مستواهم تراجع حيث ما بقاوش مدينها فالكرة والتركيز ديالهم على التداريب صبح قليل، لكن المدافعين عليهم كيشوفو أن اللاعبين فيهم اللي 5 سنين أو 4 سنين على الأقل وهو لاعب ما كيرتاحش حيث ما كاينش بديل بقيمتو، وحتى البرمجة وتراكم ليماتش ما معاونش اللاعبين للحفاظ على مستواهم.
والخلاصة أن الوداد الرياضي هذه المرة غيمشي يلعب ضد صن داونز الجنوب إفريقي بثقة محدودة، حيث الماتش صعيب والخصم قاصح والدليل أنه كان لاعب بنقص عددي لمدة شوط كامل وعجز هجوم الوداد يوصل لمرماه وبستاد دونور وما أدراك ما دونور بحضور جمهور الحمرا، فما بالك وأنه لاعب فتيرانو وقدام جمهورو، وطبعا هذا الشي ما كيعنيش أن الوداد ضعيف ولكن "اللي فرط يكرط"، حيث حتى شي حد صعيب ما يقدر يستوعب أن فريق دربوه 4 ديال المدربين في أشهر معدودة ودخل معسكر إعدادي ضعيف قبل الموسم غيربح عصبة أبطال إفريقيا، وراه كيبقى الوصول لدومي فينال المسابقة في ظل الظروف اللي سبق وذكرناها إنجاز، ولو أن الواك فريق مطالب بتحقيق اللقب ومن غيرو فهو فشل، حتى لو كان الوصول للنهائي.