الممثل أمين الناجي في حوار مع " كود ": دور الحياني غير حياتي وعائلته اطلعت على السيناريو قطعات حلوة شارة البداية للعمل وأحلم بتجسيد شخصية الزرقطوني

كود ": أمين الناجي في دور المطرب الراحل الحياني ما هي الصعوبات ؟ أو شحال أخدت منك الشخصية ديال الوقت باش تقمصها ؟
دور الحياني دفعني للاعتكاف، خمس أسابيع أو أنا ساد على راسي بحال لا حصة من العذاب اليومي والخوف لأنه شخصية محبوبة وصعب الخطأ في هذه الحالة، كنت كنفيق بالحياني أو كنعس بالحياني، عيشت ولدي أو متي لأول مرة أجواء بزز منهم باش يكون المناخ ملائم لتقمص الدور، حيث ما كنتش الامكانيات المادية باش نتعزل في مكان وحدي. الصعوبات لي كانت في دراسة الشخصية، هي الخوف المسبق من ردة فعل الجمهور والمتفرج، خاصة أن الارشيف الموجود على الحياني ضعيف هذا خلق لي مشكل في التعرف عليه بشكل أقرب.
" كود ":واش مخلقش لك الصوت مشكل ؟ أمين ممثل ولكن مغني لا !
مكينش في المغرب ممثل كيغني ) ضاحكا (. هذا السؤال يجب أن يطرح على المخرج كمال كمال، راه مني تلقيت الدعوة لتجسيد شخصية الحياني في العمل، تخلعت، أو تخلط عليا بزاف ديال الأحاسيس، أنا لم أعرف سر اختياري من طرف المخرج، كنا أثنين مرشحين للفوز بالدور، ووقع اختيار كمال علي
" كود ": أشن هي حقيقة الخلاف مع عائلة الحياني ؟
ماعنديش معلومات كثيرة ودقيقة، عائلة الحياني تشاركات معنا الطعام، أو قطعات الحلوة ديال البداية.
" كود ": امتى بدا الخلاف بالضبط.
بعد شهر من بداية العمل، كانت حسناء ابنة الحياني دارت خرجة اعلامية على احدى الجرائد قالت فيها أن سيناريو ماشي هو هذاك.
" كود ": بحكم اطلاعك على الشخصية أو تجسيدها واش دكشي هو هذاك ؟
الأرشيف ماعنديش، الحياني دين غير التعاويد ديال الناس لي عيشاتو عليه، أما شي حاجة موثقة بالكتابة أو الصورة أو الصوت فلا. كمال كمال نقل الصورة الإيجابية لي رسمنها الناس على الحياني أو هذا واقع.
" كود ": الآن من بعد عرض الحلقات ديال السلسلة أشنو هو رد الفعل الأولي للجمهور ؟
كاين اعجاب أو كاين بعض الملاحظات.
" كود ": بحلاش ؟
اختيار الممثلين 5 ) الكومبارس ( بحمك ضعف الامكانيات لم يكن الاختيار صائب في مجموعة من الاختيارات
" كود ": أش غيرات شخصية الحياني فحياة أمين الناجي ؟
من بعد الدور ديالا لمهيدي في مسلسل " وجع التراب " الحياني شكل منعطف آخ ر في الحياتي ديالي، عطاتني بزاف ديال القناعات فحياتي، أولها الثقة في النفس والشجاعة على تقمص أدوار أخرى وشخصيات أخرى يمكن يكون فيها الرقص أو الحركة.
" كود ": أش ناهي الشخصية لي كتحلم تجسدها مستقبلا ؟
الزرقطوني.
" كود ": علاش ؟
هذا الاسم يستحق أنه يعرف، أو يتقال المغاربة اشنو دار للوطن، التلفزيون المغربي خاصو يبدا يتناول هذه التيمة المتعلقة بشخصيات المقاومة وتاريخها، أو منبقاوش نشوفو أسماء المقاومين غير فالشوارع والزناقي. علاش الزرقطوني خاصة، حيث بالنسبة لي هو من المقاومين الشباب المعاصرين بالنسبة لجيله.