كلشي تبدل فالتعيينات: لائحة الولاة كانت واجدة وتخربقات بعد فضيحة زهود واقحام بيرو فهاد الجديدة: الملك گال لرئيس الحكومة ولجميع المسؤولين: ما تجيبوش اللي ما شي نقي وكفء وعندو اخلاق

باينة وزير الداخلية عبد الوافي لفتيت تخلع باش كان مع الملك محمد السادس يوم تقديم تقرير المجلس الاعلى للحسابات بحضور رئيسه ادريس جطو وكان ابن عرفة ووزير المالية بوسعيد. ماشي غير لفتيت اللي كان موجد لائحة الولاة والعمال بل جميع المسؤولين من بينهم رئيس الحكومة. الزلزال السياسي اللي ضرب 9 وزارات واضحة رسالتو من الملك لهاد الناس: ما تبقاش تجيبو لي اللي ماشي نقاية وماشي اكفاء وما عندهمش اخلاق وعندهم مصالح وتطلبو مني من بعد اعفاءهم.
دابا التعيين وطرقه وشروطه كلها غادية تغير. ما يبقاش باك صاحبي وولد حزبي. للي جاب لي لائحة عوجا يتحمل المسؤولية.
مثلا كاين خبر راج عن ان لفتيت كان داير فهاد اللائحة بعض المقترحات بحال انيس بيرو باغي يعطيه شي منصب. يمكن كاين شي تضارب المصالح. طبعا هاد الشي خاصو يكون. فضايح شي مسؤولين المالية كتخلع. الصورة ديال الدولة وهبتها كتهز
الداخلية وقعات فخطأ كبير بعد تعيين عبد الكبير زهود فكازا. السيد يالله وصل خدا كونجي وباش جا بدل لفراش. الحاجة الوحيدة للي دارها فاهم جهة فالمغرب هي دارو او بالاحرى اقامة الوالي اللي كاينة فشارع مولاي رشيد فكازا.
دابا الداخلية او غيرها غاديين يديرو الف حساب قبل اقتراح اي اسم. هاديك اللائحة ديال لفتيت غادية تعجن اكثر من مرة قبل ما ينزل زلزال اخر عند الولاة والعمال. زلزال غادي يكون قوي بحال الزلزال اللي ضرب الحكومة.