واش بصاح ترشيح الباطرونا لمرأة ترشيح نضالي؟ قيادي من الاغلبية "هاديك مكودينها وهادوك غادين يصوتو للبام وهاد الشي غير مسرحية" ومستشار يرد عليه "كذوب ما كاين حتى شي توجيه لينا"

الباطرونا ارتكتب خطأ سياسيا في اول تجربة لها في مجلس المستشارين. هادوك جاو يدافعو على مصالح رجال الاعمال واخا هادي ما شاداش. حقاش غادين نلقاو فالحكومة وفمجلس النواب وفمجلس المستشارين حضور قوي لرجال الاعمال. فالسباق نحو رئاسة مجلس المستشارين قدمت الباطرونا مرشحتها نايةل التازي. طبعا كيتفلاو لانها تعرف باللي حتى هادوك 8 الاصوات محالش تجيبهم مادام مرشح العيون سيصوت لحزب الاستقلال لانه منه. التبرير المقدم ل"كود" من قبل اصحاب الفكرة هو انه "ترشيح نضالي". يعني اعطاء المرأة مكانة لانها ظلمت في الانتخابات الاخيرة ومن اصل 120 مقعد يالله جابت 14. طبعا الباطرونا مسؤولة على هاد الشي لو انها فرضت ان يكون على رأس اللائحة امرأة في كل الجهات لكان العدد 7 نساء ماشي امرأة واحدة.
امر اخر يدعو الى الاستغراب هو ان الباطرونا المتهمة من قبل حكومة بنكيران قبل سنتين بممارسة السياسة دخلت اللعبة السياسية ولم تعد فيدرالية للدفاع عن مصالح الباطرونا. ففي اول تجربة كان على الاعضاء الثمانية ياخذو تجربة اولا وياخدو مسافة مع كل الفرقاء السياسيين ماشي يدخلو فتنافس عارفين ما غادين يديرو والو. قيادي في الائتلاف الحاكم لا يصدق هذه الرواية. قال ل"كود" "هادي مناورة شي جهة كالتها ليهم وصافي. راهم دارو هاد الشي باش يصوتو على البام ومرشحها وصافي. وراه كانت لقاءات فالصيف بين قيادة الباطرونا وبين قيادة البام". غير ان احد الاعضاء الناجحين من الباطرونا نفى ذلك وقال ل"كود" "تلاقينا نهار السبت وما كاين حتى شي توجيه وهاد الشي غير تفسيرات ديالهم. كل واحد غادي يصوت على اللي بان ليه مناسب الى ما توقفاتش مرشحتنا واللي اختاريناها باش نرسلو رسالة واضحة للمجتمع".
المصدر اضاف ل"كود" "حنا ماجيناش نديرو السياسة. حنا صوت المقاولة فمجلس المستشارين ما غادين لا نمشيو مع الاغلبية لا نمشيو مع المعارضة. غاديين نكونو مع كل مشروع كيدافع على المقاولة وخلق الثروة والشغل فالمغرب".
مشكلة ترشيح الباطرونا لامرأة ماشي فكرة عبقرية. "دابا شي وحدين تالفين كيمارسو السياسة ومخبيين وراء الشعارات ديال المناصفة. خاص الواحد اللي بغى يرشح امرأة يرشح اللي يكون قادر يسير المجلس ماشي تفلية هادي" يرد قيادي من الاغلبية في تصريح ل"كود". واتهم الباطرونا ب"اللعب الباسل" واضاف ل"كود" "يمكن الاغلبية تصوت على مرشح كفء من الباطرونا. عندو خصال تسمح ليه يسير مؤسسة دستورية كبيرة بحال هاد المجلس. كاينين نساء قادرات يسيروه ولكن ماشي مرشحة الباطرونا" يختم مصدر "كود".
يوم غد ستتضح الصورة سنعرف من صوت على من وهل فعلا هذا ترشيح نضالي ام سياسي