مصيبة هادي.. خمسة ديال البنات خطفوهم من الشارع العام وغتاصبوهم فالقنيطرة

شدات عناصر الشرطة القضائية فالقنيطرة الأسبوع الي فات عصابة كتكون من 5 أفراد ختاطفو خمسة ديال البنات بطوموبيل مكرية واغتاصبوهم جماعيا بالتسلسل وسط غابة فطريق “سيدي علال البحراوي”.
وقالت “الصباح” لي نشرات الخبر فعدد اليوم الثلاثاء أن الموقوفين تمت إحالتهم على الوكيل العام للملك لدى محكمة الإستئناف بالقنيطرة، بتهم كتتعلق بتكوين عصابة إجرامية متخصصة في الإختطاف والإحتجاز والإغتصاب مع الإفتضاض والسرقة بالسلاح أثناء الليل باستعمال عربة ذات محرك وإخفاء المسروق، كل واحد حسب المنسوب ليه.
وتم القبض عليهم بعدما تلقات الضابطة القضائية مجموعة شكايات فنفس الوقت، ونجحات فتحديد هويات المتورطين، والطوموبيل الي استعملو في عمليات الإختطاف والإحتجاز، ولقاوهم فمحطة ديال سيارات الأجرة بالمدينة، وشدو جوج، وبعدها قبطو الباقي، وتبين أنهم كينحادرو من تمارة وسلا وسيدي علال البحراوي.
وبينات المحاضر المنجزة من قبل الضابطة القضائية وجود اعتداءات جنسية مختلفة وشاذة في صفوف البنات بخمسة وفيهم لي إفتضو ليهم بكارتهم ، كما أن وحدة فيهم صرحات بتعرضها للتهديد بحيت حط ليها واحد موس على رقبتها وسط الغابة فحالتما غوتات وفاش طلقوهم الجناة قالو ليهم مايدوروش لجيهتهم.