التقريعة كانت زوينة حتى ولات اللوك الرسمي ديال العبيطات. اول مرة صلعت ف2014 وعجبني راسي بزاف فكرني راسي بسيڭورني ويڢر ف”آليان” و قررت نبقى نقرع حيث جات معايا

أول مرة صلعت كانت ف 2014. كنت قبل دايرة الكويبة ديال الشبيبة الهيتليرية حيث واحد الممثلة كتعجبني بزاف كانت دايراها و كان شعري طويل و لكن مهلوك من سنين ديال الكيراتين، لذلك مشيت بتصويرتها عند واحد الكوافور خطير و صرعها الصراحة واخا تقامت عليا ب 1500 درهم. شي ست شهر من بعد، خرجت من الخدمة و ولا عندي المدخول محدود بزاف، شديت الطوندوز للي عندي فالدار و دليت راسي فوق الطواليت و كرطت كلشي. الغرض فاللول كان نحيد ڭاع الشعر للي طاب بالصباغة و السيشوار و نبدا صفحة جديدة و نخليه يطوال زوين بلا مواد كيماوية. للي وقع هو عجبني راسي بزاف مني قرعت، بكل تواضع فكرني راسي بسيڭورني ويڢر بطلة أفلام “آليان” و قررت نبقى نقرع حيث جات معايا.
بطبيعة الحال مني كتكوني أنثى و كتقرعي، حياتك كتبدل شوية. أولا غير بيني و بين راسي، ديك الكويبة صالحاتني مع كمارتي للي كنت كنخبيها قبل ورا الشعر، و حيث ما بقيتش مخبياها ورا الشعر، حناكي صفاو من الحبوب حيث المسام ديالي ما بقاوش مبلوكيين بالزيوت الطبيعية و المواد الكيماوية. ربحت بزاف ديال الوقت حيث ما بقيتش كنبات تحت الدوش باش نمشط و نغسل و نشلل و ندير الملين و نعاود نشلل، و اقتاصدت بزاف ديال الفلوس حيث كنت كانقرع بوحدي بالطوندوز. في الزنقة ما بقيتش كنعاني من التفسفيس و النڭان و فبعض المدن السياحية السرباية كانو تيجيبو ليا كاسي ديال روج حتى لاطيراس حيث ڭالو كانبان بحال شي ڭاورية، و بالتالي ماغادي يتخلق ليهم حتى شي مشكل طالما ما كندويش بالدارجة. العيالات كانو تيحييوني على شجاعتي، واخا مع الوقت استنتجت بللي كانو كيعنيو بيها “كيفاش كتزعمي تخرجي بحال هاكا و نتي راسك بحال القلوة” حيث المرا قليل جدا فاش كتجامل من نيتها، و داك الشي خوفا من تكبر البعرة لصاحبتها و تغلبها فالمنافسة الجنسية. بالنسبة للرجال ما تبدلات حتى شي حاجة حيث المغاربة يخشيوه فيك واخا تكوني دايرة بحال طارو دالزبل طالما كتباتي، وانا كنبات و زايدون عندي الدار.
و لكن واخا هاكاك والله لا عاودت قرعت حيث ولات الكويبة الرسمية ديال واحد الفئة ديال المجتمع كتجيني مثيرة للإشمئزاز و ما كيشرفنيش نتجمع معاهم: الموجة الرابعة ديال مناضلات حقوق المرأة. هاد العبيطات شانين حرب ضد الرجولة حيث زعما طاقة سامة تسبات للبشرية فالحروب و الدمار، و فنفس الوقت ماكيعتارفوش بللي هاد الحروب هي للي بنات الحضارات و زادت بالبشرية للقدام، و كيقدسو العيالات بحال إلى معصومات من الخطأ و فنفس الوقت كيحاربو مظاهر الأنوثة بجميع أنواعها. تيصلعو الراس و تيخليو شعر الإبط و العانة يطوال و تيقاطعو الماكياج، و لكن إلى رفضتي تنعس معاهم غادين يسميوك ميزوجوني حقير. كنعرف بحال هاد النماذج شخصيا و علاش غادي نتشبه بشي واحد كيدير ليا الكونصير؟