علمت “كود” ان الفيدرالية البيمهنية لقطاع الدواجن المعروفة ب”فيسا” عبرت عن رفضها التام لمشروع تقدم به عبد العزيز العماري عمدة الدارالبيضاء لبناء سوق للجملة خاص بالدجاج فمنطقة لعسيلات ضواحي الدارالبيضاء. ماشي غير هاد الفيدرالية اللي كيتجمع كاع مهنيي الدجاج واللي تابعة للباطرونا٬ اللي رافضة حتى المكتب الوطني للسلامة الصحية للمنتجات الغذائية =المعروفة ب”اونسا” ما قابلوش. علاش؟ حقاش وفق مصدر من الفيدرالية ل”كود” هاد المشروع دار وما فخبار لا المهنيين ولا “اونسا”. ففي مراسلة للعمدة عبر رئيس الفيدرالية عن استغرابه من مشروع بناء سوق جملة جديد بلا ما يكون فخبار المهنيين شي خبار. سمعو لخبار غير فالصحف. وقد وجه رئيس جمعية “فيسا” رسالة الي عبد العزيز العماري رئيس عمدة الدار البيسضاء بخصوص سوق الجملة هدا وقال باللي ما فهمتش كيفاش يدار مشروع بحال هادا فمنطقة بعيدة ب40 كلمتر على الدارالبيضاء اي ان اللي يمشي ويرجع للمارشي خاصو يقطع 80 كلمتر. هاد الشي علاش الفيدرالية عبرات على تحفظها من المشروع اللي بغى مجلس المدينة يقولبهم ويشركهم فيه يوم الاعلان على طلبات العروض الخاصة به. طبعا ما حضروش ليه “فيسا” اعتبرت ان هاد لعسيلات اللي اختارها مجلس المدينة لاقامة سوق جملة الدجاج غادية تكون كذلك بعيدة على المراقبة البيطرية. بالاضافة الى ان المشروع الجديد كيقتاصر على دخول 20 كاميو ليه يوميا ودابا فهاد السوق اللي كاين كيدخلو 50 كاميو يوميا يتزاد على هاد الشي وفق مصدر “كود” ان المشروع دار بلا خبار “اونسا”. بلا هاد المكتب الوطني للسلامة الصحية للمنتجات الغذائية ما يمكنيش يكون شي مشروع.