الوقفة خاصها تكون قدام "مدينة بيس" ماشي قدام ولاية الامن. راه الاغتصاب الجماعي فالطوبيس ماشي مشكلة امنية بل تربوية ثقافية والعقاب والحبس ووو ماشي حل بوحدو

كاين كلام على شي وقفة غدا ولا بعد غدا امام ولاية الامن بالدار البيضاء والمناسبة هاد الاغتصاب الجماعي لمعاقة فطوبيس وتصويرها. فقضايا اخرى كان تنظيم وقفة قدام الامن مقبول. حقاش كان يقدر يكون تقصير ولا خدمة ناقصة للامن ولكن فهاد القضية راه دور الامن ثانوي. شدو المتهمين اللي وصلو دابا ل7 وغادي يتزاد الثامن.
اللي خاص تنظم وقفة قدامو اولا هي شركة "مدينة بيس". الشركة ديال الطوبيسات اللي كتقول باللي كل حافلة فيها 4 الكاميرات. الحدث وقع هادي 3 اشهر قبل من رمضان كاع. علاش الناس اللي مكلفين بالامن فالشركة ما شافوش الفيديو ايلى كانو الكاميرات خدامين. علاش ما وقع لا تبليغ لا والو. المسؤولية ديال امن المواطنين باش يطلعو للطوبيس مسؤولية مدينة بيس.
بلا ما نهدرو على مسؤولية الشوفور. الامن وفق ما اكده مصدر ل"كود" ما عمرو توصل بشي شكاية باش يتحرك حتى بان الفيديو. حتى مدينة بيس وهادي كارثة ما فراسها والو حتى خرج الفيديو. اذن الوقفة خاصها تكون قدام هاد الشركة.
الوقفة ممكن تكون كذلك قدام مجلس المدينة باعتبارها هي اللي مكلفة بهاد القطاع ولا هاديك شركة "كازا للنقل". اللي وقع العقد مع مدينة بيس" وفق دفتر تحملات هو مجلس المدينة، وبعدو كتجي الولاية. والي الجهة خرج عطلة وما دروزش شهر خدمة. دورو كبير فما يتعلق بامن كازاوا وبالنقل ووو
طبعا اللي وقف ماشي مشكلة امنية فقط. الامن ثانوي. المشكلة لكبيرة تربوية ثقافية. هاد لولاد ما عندهمش اسرة لا عائلة ما عندهمش مدرسة واش موفرين ليهم البسيط من الامكانيات باش تكون عندهم ثقافة يعتبرون ان ما حدث راه جريمة كبيرة ماشي لعب الدراري. بلا ما يقوم كل واحد فالمجتمع بدورو من الاسرة الصغيرة الى اكبر ممثل للدولة غادي يكونو بحال هاد الشباب غادي يبقى الاغتصاب وعلاجو ما عمرو يكون امني. فضيحة كبيرة ايلي كان علاج امراض واجرام بحال هاد الشي امني. مشينا فيها كلنا.