مسؤولونا ما عندهمش مع لمرا. ها شكون خدا بلاصة شكون فالهاكا. ها اللي دخلو جداد: غربال وعادل وبنحمزة ولعروسي وها فبلاصة من ورئيسا النواب والمستشارين ختارو غير الرجالة

عند مسؤولينا مشكلة كبيرة مع لمرا. مازال العقلية الذكورية كتحكم فيهم فاختياراتهم. دابا اجيو نشوفو تعيينات حكماء الهيأة العليا للاتصال السمعي البصري اللي تعرف عليهم البارح لمغاربة بعد ما تنشرو فالجريدة الرسمية.
حسب القانون المنظم هناك 9 حكماء. رئيسة الهيئة و4 حكماء يعينهم رئيس الدولة و2 حكماء يعينهم رئيس الحكومة وحكيم يعنه رئيس مجلس المستشارين واخر يعينه رئيس مجلس النواب.
وهاد الهيئة فيها ادارة عامة للاتصال السمعي البصري بالهيئة العليا للاتصال السمعي البصري. هاد المدير كيعينو حتى هو رئيس الدولة
بنداو بالتعيينات اللي تعرفو عليها لمغاربة البارح.
تعيينات الملك اللي كيسميوها تعيينات بموجب ظهير شريف: المحامي ياسر غربال فبلاصة الكاتب والديبلوماسي عبد القادر الشاوي. هاد الاخير بغى يمشي يرتاح. الشاوي ديما زاهد فالمناصب. بقى بنعيسى عسلون فبلاصتو كمدير عام للاتصال السمعي البصري بالهيأة العليا للاتصال السمعي البصري
رئيس الحكومة عين غير واحد جديد اللي هو داك اللي كيدعي الكتابة واسمو محمد لعروسي فبلاصة خليل العلمي الادريسي وخلى فاطمة البارودي اللي كان عينها رئيس الحكومة السابق العثماني بعد اجراء حوار معه وبعد ما قلباتها حجاب.
رئيس مجلس النواب عين جامعي اسمو عادل عبد اللطيف فبلاصة بديعة الراضي. الطالبي العلمي كان يعين لمرا فبلاصة مرا ولكن قبل بطريقة غريبة انو يهمش لمرا بل ويجيب واحد محسوب على البام وما عندو علاقة بحزبو.
فيما الاستقلالي النعم ميارة رئيس مجلس المستشارين وفي لفكر حزبو فتهميش الكفاءات النسائية فجاب ولد حزبو عادل بنحمزة فبلاصة البامي محمد المعزوز.
اي ان 4 تعيينات جديدة ما فيها حتى مرا، لحسن الحظ كاين حضور نسائي فمجلس الحكماء من خلال رئيسة الهاكا لطيفة اخرباش ونرجس الرغاي الصحافية اللي بقات فمنصبها والبارودي اللي كانت باسم رئيس حكومة من البي جي دي وخلاها رئيس حكومة من التجمع الوطني للاحرار.
باختصار غير لقصر ورئاسة الحكومة اللي تفكرو المرأة المغربية