الزلزال السياسي فعهد محمد السادس: علاش بنكيران ما عندو علاقة ب"منارة المتوسط" واخا جطو اللي كان جبان فهاد الشي وما هدرش على امور كثيرة فتقريرو قال: مجموعة من الاختلالات تم تسجيلها في الحكومة السابقة

موضوع الزلزال السياسي اللي وقع البارح والمتعلق باعفاء 4 وزراء فهاد الحكومة =حصاد وبنعبد الله والوردي وبنالشيخ و5 فالحكومة السابقة =بلمختار والصبيحي وحداد والحيطي والسكوري= بالاضافة الى 14 مسؤولا ساميا مازال ما حددوش العقوبة اللي غادين ينالوها٬ هاد الزلزال كلشي هدر عليه. زلزال ديال بصاح. ما عمرها وقعات فعهد محمد السادس من نهار جا الحكم. ادريس جطو رئيس المجلس الاعلى للحسابات عرض الاختلالات للي وقعات ولكن بقى تقني. ما كانتش عندو الجرأة يمشي بعيد. ما كانش عندو الشجاعة يقول باللي هاد المشروع ديال "منارة المتوسط" راه كان خاص يشرف عليه رئيس الحكومة ويتساءل علاش.
جطو ولد المخزن وعارف حدودو. البارح كان نقاش علاش بنكيران اللا وشي كيقولو بنكيران ما دار والو فهاد المشروع ديال منارة المتوسط. رئيس الحكومة السابق كان اعلن ل"كود" قبل اشهر انه علم بالتوقيع على الاتفاقيات ديال "منارة المتوسط" فاكتوبر 2015 بتطوان فالتلفزيون. يعني ما استدعاوهش. علاش؟ هاد الشي اللي كان خاص جطو يقول لينا. علاش تم تغييب رئيس الحكومة السابق. بنكيران اضاف ل"كود" فهاداك التصريح ان هاد الموضوع "ما عمرو تجبد فشي مجلس حكومي" اي ان وزراؤو ما عمرهم خبروه.
واش هاد الشي معقول فدستور 2011؟ اللا ماشي معقول رئيس حكومة ما يعرفش. غير راه حنا فالمغرب عندو منطق اخر. يستحيل شي رئيس حكومة شي نهار عندنا غادي يقول للملك: سيدنا علاش ما خبرتينيش. حقاش الملك دستوريا عندو الحق ما يخبروش وكاينة امور اخرى فاحايين كثيرة تتفوق على الوثيقة الدستورية.
جطو كان يكون جريء ويثير هاد النقطة اللي مهمة بزاف فهاد المشروع. ثم خاصنا نعرفو السياق. هاد المنارة فهاداك التوقيت كل خصم سياسي ودار ليها قراءة. كاين اللي قال مصالحة مع الريف وكاين اللي قال دعم لالياس العماري ولحزب البام وكاين اللي قال هادي بداية وغادية تشمل جميع جهات المغرب. المهم استحضار وقتاش وفين وقعات مهم.