واش هادي دولة ولا فيرمة شي وحدين وعايشين فيها. 3 مؤشرات خايبة بزاف. دولة 360 كترهب شركات الدولة والقطاع الخاص كيعطيه مستشار الملك تصريح قبل لاماب وزعيم حزب يرأس وفد المنتخب ورجعو ها الموقع تابع للدولة وهنيونا يا رباعة الاغبياء اللي كتسيئؤ للدولة ولرئيسها

"غير يكولو لينا هاد السيد منين كيجيب هاد الصلاحيات" هاذا تصريح رئيس الحكومة السابق الامين العام لحزب العدالة والتنمية عبد الاله بنكيران ل"كود" البارح على قضية رحلة الياس العماري الامين العام لحزب الاصالة والمعاصرة مع المنتخب وعودته مع الاسود. هاد الجملة تقدر توسع باش تصبح "غير يكولو لينا منين كيجيبو هاد الكمامر هاد الصلاحيات". وقعات 3 امور فالايام الاخيرة مؤشرات على ان الدولة ولات فيرمة لشي وحدين وصافي.
نبداوها فالاخير. موقع 360 او دولة 360 كيف سبق وصفها المبدع حميد زيد في احدى مقالاته المنشورة ف"كود"٬ تجاوزت كل الحدود. وصلات لاهانة الدولة لاهانة مؤسسات الدولة. هاد الموقع كاليك صرح ليه مستشار ملكي وهو ياسر الزناكي باش يقول ليه هاديك الصورة مفبركة ديال الملك فقطر وهاز "لكم العالم ولنا تميم". فضيحة حقاش كتعطيو مصداقية لموقع عارفين كلشي انتوما اش كيدير فالاشهار. كتعرفو كلكم ان المكتب الوطني للسكك الحديدية مثلا داير معاه صفقة حقاش خايف وسنوية ديال الاشهار ما بين مليون و500 الف درهم ومليون درهم سنويا ، لخليع خاف واكيد كان شي حد اتصل بيه. مخلوع حقاش البنك الشعبي عطاه 870 الف درهم اشهار لشهرين فقط. باش تفهمو مزيان. نفس الشركات ما كتجاوزش 100 الف درهم سنويا و30 الف درهم اشهار. ديرو الفرق.
واش تصطيتو. راه مواقع مغربية منها "برلمان" خرجات باللي الصورة مفبركة قبل من تصريح المستشار الملكي ولكن هاد الشي اللي دار راه فضيحة. كيفاش مستشار ملكي يتكلم فموقع ومن بعد مدة عاد يتنشر فوكالة المغرب العربي للانباء. واش هادي دولة ولا شي حاجة اخرى. ثم هاد الموقع عزيز عليكم ورجعوه تابع للدولة. هاديك الساعة ما كاين حتى مشكل. مواقع اخبارية كثيرة قلبات على خبار التكذيب حقاش حسات بالحكرة. علاش هاد التعامل مع هاد الموقع.
ثم علاش هاد الزناكي اللي كيخاف من خيالو وماشي شي حد فيديو وشوفو تاريخو تعرفو. ياك كاين ناطق رسمي باسم القصر. هو المخول بالحديث عن امور مثل هذه. وا حتارمو المؤسسات يا بنادم
ثم علاش كاع المغرب خرج بيان. يدفع بالقطريين كيف دارو من بعد يديرو بيان وكان تكون القضية واعرة بزاف. واش هادوك اللي مكلفين بالتواصل فالقصر الملكي اغبياء حتى لهاد الدرجة
راه كيشوهكم. كيمس مصداقيتكم. غاديين فكود نشرو كاع الاشهارات ديال الدولة ديال القطاع العام اللي كيدير اشهار سنوي مع هاد الموقع. القطاع الخاص يدبر راسو واخا كيطلبو منو يدير وكيدير. كيهمنا القطاع العام اللي ديال لمغاربة من وزارات ومؤسسات…….
القضية الثانية اللي كانت خطيرة وكتمس مصداقية الدولة وهي ترؤس الياس العماري الامين العام لحزب الاصالة والمعاصرة لوفد المنتخب المغربي باش تاهل ماشي قبل ما يتاهل. جا فطيارة المنتخب ونزل هو الاول واستقبل من قبل السلطات العمومية. فضيحة بكل المقاييس. المنتخب استغل سياسيا ببشاعة. الياس العماري قال باللي مشى على نفقتو. طبعا هاد الشي كذوب. اولا من الخميس كل الرحلات بالفين درهما =2000 درهما= ذهابا واياب والياس نزل فالاقامة ديال المنتخب فسوفيتيل. فالتور =حقاش كاينين جوج سوفيتيل= شاداه الجامعة الملكية لكرة القدم وهو اللي كان نازل فيه. ثم الفرشة كانت باش رجع مع المنتخب وكانت فضيحة كبيرة.
شكون الدولة وشكون اللي ماشي الدولة.
القضية الثالثة اللي كان عندها ارتباط بهاد القضية ديال الياس. حضور مستشار الملك فؤاد عالي الهمة لعرس ابن الياس العماري كان خطآ. بلا هاديك الهدرة ديال العلاقات الانسانية والتخربيق. كلشي عارفين المغرب. عارفين معنى حضور شخص =نفترض حسن نية الشخص= ولكن فظروف بحال هادي اللي كيعيشها "البام" رسالة واضحة. واخا يجريو على الياس دابا من الحزب حضور الهمة كان هو الطامبو هو الكاشي على الحضوة اللي ولات عندو وبانت فقضية المنتخب.
الدولة عندها مؤسسات رسمية. خاص احترام هاد المؤسسات. ما كاين معنى للمسؤولية والمحاسبة اللي كاينة فالدستور وتحدث عليها الملك فخطابو الشهير٬ مع وجود دولة وسط الدولة. غير هاد الدولة ما عندها مسؤولية وكتصرف بطريقة غريبة.
المغرب غادي بايقاعات مختلفة. شي فالدولة خدام مزيان. فالحكومة فالمؤسسات العمومية بالمؤسسات السيادية ومع هاد الشي كاينين هاد النماذج. يعني دولة تالفة باغية دولة المؤسسات وكتسمح بوجود هاد المؤشرات. وا ختارو دابا بين دولة 360 ودولة المؤسسات