الزين ها هو والصوت فينا هو.. نسخة فاتي جمالي الممثلة غيتة لحمامصي دارت أغنية جديدة مع نفس كاتب كلمات “غلطة كبيرة”–فيديو

المغنية غيتة لحمامصي طلقات البارح السينگل ديالها الجديد في حفل كبير دارتو في واحد من الفنادق المصنفة، الأمر لي كينطابق عليه المثل لي كيقول “الگنازة كبيرة والميت فار”.
غيتة بحالها بحال فاتي جمالي لا صوت لا والو فقط عرام ديال الصنايع، ها التمثيل ها الغناء وطبعا الشكل لي كيلعبو عليه بزاف باش يطلعو في المجال الفني.
لي كتب كلمات الأغنية هو أنس العراقي وهو نيت لي كتب الكلمات لفاتي جمالي في أغنيتها الاستعراضية “غلطة كبيرة” ولي نوضات صداع كبير وجمعات أكبر عدد ديال “الديسلاك” في تاريخ اليوتوب المغربي.
السؤال لي كنطرحوه اليوم هو واش هاد المغنيين والكتاب وعلى رأسهم أنس العراقي غادين في قضية تشييء المرا، وولاو كيركزو على الأجساد أكثر من الصوت والموهبة وبداو كيختارو المغنيات الزوينات باش يبانو في اعمال ممكن نقولو عليهم أي حاجة إلا أنهم أغاني.