فرنسا صادقات على قانون باش تساعد المثليات والعزبات يولدو بلا مشاكل

فرنسا قررات باش يشمل القانون ديال المساعدة الطبية في الولادة كَاع العيالات بدون استثناء، وحتى المثليات والعازبات غادي يستافدو أخيرا بعد مدة طويلة من الصداع اللي ناض عليه.
الجمعيات المدافعة على المثليات والعازبات فرحو بزاف بالقرار اللي بقاو سنوات وهوما كايطالبو بيه وكايتسناو فيه، في الوقت اللي الحركات المحافظة اليمينية كعاو وهاجمو هاد القرار ديال توسيع قاعدة الفئات اللي غايستافدو بفضل هاد القانون.
وقبل هادشي كان قانون المساعدة الطبية (La procréation médicalement assistée) PMA خاص فقط ب "العيالات الإيتيرو" قبل ما تتم المصادقة على استفادة الجميع منو و حيدو التمييز اللي كان فيه.
ومن غير فرنسا، كاين بزاف البلدان الأوروبية اللي كاتخلي العازبات والمثليات يستافدو، بحالهم بحال باقي العيالات، من المساعدة الطبية في الإنجاب بحال السويد وفنلندا والدنمارك وبريطانيا وإيرلندا وبلجيكا وهولندا ولوكسمبوركَ وإسبانيا والبرتغال.