شوف البؤس والانحطاط والتجني وقلة الترابي وانعدام الأخلاق والمبادئ والفقر الحقوقي والانساني لي وصلات ليهم الجمعية المغربية لحقوق الانسان لي من بعد ماتحولات لحانوت ديال تاعطايت هاهي دابا كتحول لمحكمة تفتيش وباغا تدعي قضائيا موقع كود

شوف البؤس ، وقلة الشغل، والانحطاط، والتجني، والكذوب والزفوط، وقلة الترابي، وانعدام الاحترام والأخلاق والمبادئ، والفقر الحقوقي والانساني لي وصلات ليهم الجمعية المغربية لحقوق الانسان، لي من بعد ماتحولات لحانوت ديال تاعطايت هاهي دابا كتحول لمحكمة تفتيش قروسطية وباغا تدعي قضائيا موقع كود لي من ديما مسكين كان منبر للإمعات والأقليات والمستضعفين وللجمعية براسها.
ودابا كأي يساريي العهد الجديد نكارين الخير قررات تدعي المنبر لي كان كيعطيها فرصة فين تهدر وكون غير من أجل شي حاجة تقدمية بل العكس دعوة خوانجية اقصائية بالتعاون مع محامي كيعرف راسو كحقوقي انتقل بسرعة من مسالي راسو باغي ينصب راسو المتحدث الرسمي بإسم گاع الطنجاويات علما أنهن لم يسمحن له بذلك غير نقز هاكاك وصافي، تتقيزة من الدفاع على المآثر التاريخية للدفاع على الاخلاق البالية والدفاع على لباس الطنجاويات كأن تشبيههن بأعظم فنانة في هاد العشرية الاخيرة هو اهانة ليهم.
فجأة كنلقى أن جمعية حقوقية ومحامي باغين يدعيوني بإسم اختي المحجبة والام ديالي المنقبة لي ساكنين في طنجة وخلاقو فيها، خايبة حتى لتعاويدة وهادشي بلا خبارهم غير ناضو وحدين وقررو أنهم ينصبو محكمة تفتيش دفاعا على حاجة مكايناش اصلا ، لايدي گاگا مسكينة من بعد كاريير قد لخلا وأوسكار هاهي باغين يردوها اعداء الفن والابداع معيورة ومسبة وان التشبيه بها هو اهانة ، تاني حاجة شكون اصلا لي مفتارض ان الطنجاويات بالضرورة كلهم محجبات على شاكلة واحدة الحجاب والنقاب بحالو بحال اي لباس في العالم ماشي لباس مقدس لا يجب حتى السخرية منه او معارضته راه غير حوايج هادو ماتزيدوهمش لينا في لائحة المقدسات الطويلة .